Shavkat Mirziyoyev 24-mart kuni Toshkent xalqaro investitsiya forumi doirasida Osiyo taraqqiyot banki prezidenti Masatsuga Asakavani qabul qildi. Bu haqda Prezident matbuot xizmati xabar qildi.
Qayd etilishicha, uchrashuv avvalida bank rahbari Mirziyoyevni O‘zbekistonning yetakchi xalqaro moliya institutlari rahbarlari va biznes vakillarini jamlagan Investitsiya forumi muvaffaqiyatli o‘tkazilgani bilan tabriklagan. OTB bilan strategik sherikligini yanada kengaytirishning dolzarb masalalari va istiqbolli yo‘nalishlari ko‘rib chiqilgan. Davlat rahbari OTB prezidentini yaqinda navbatdagi muddatga qayta saylangani bilan tabriklab, O‘zbekistondagi yangilanishlar dasturini ilgari surishda, shu jumladan, koronavirus pandemiyasi oqibatlarini oldini olishda ko‘rsatilayotgan ko‘mak uchun minnatdorchilik bildirgan.
Ikki tomonlama munosabatlar rivojlanib borayotgani qayd etilgan. Keyingi yillarda loyihalar portfeli ikki barobarga kengayib, bugungi kunda 9 milliard dollardan oshgan. Qo‘shma loyihalar doirasidagi investitsiyalarni o‘zlashtirish sur’atlari ham ikki barobar jadallashgan. Bank tomonidan mamlakatda amalga oshirilayotgan islohotlarga, shu jumladan, makroiqtisodiy barqarorlikni ta’minlash, moliya sektori, energetika, transport va infratuzilmani modernizatsiya qilish, inson salohiyatini ro‘yobga chiqarish borasida ko‘rsatilayotgan texnik ko‘mak yuqori baholangan.
Uchrashuvda O‘zbekiston va OTB o‘rtasidagi ko‘p qirrali hamkorlikning yangi dasturini tayyorlashga e’tibor qaratilgan. Shuningdek, “yashil” iqtisodiyotni jadal joriy etish, loyihalarni aralash moliyalashtirish mexanizmlarini rivojlantirish, biznes, shu jumladan ayollar va yoshlar tadbirkorligini moliyalashtirish dasturlarini kengaytirish, davlat-xususiy sheriklikning samarali mexanizmlarini joriy qilish, ta’lim va sog‘liqni saqlash loyihalarini qo‘llab-quvvatlash hamkorlikning ustuvor yo‘nalishlari sifatida belgilangan.
O‘zbekiston va Osiyo taraqqiyot banki o‘rtasidagi strategik sheriklikning ustuvor yo‘nalishlarini ilgari surish bo‘yicha “yo‘l xaritasi”ni birgalikda qabul qilish yuzasidan kelishuvga erishilgan.
Mavzuga doir:
- Shavkat Mirziyoyev Yevropa tiklanish va taraqqiyot banki rahbari Odil Reno-Basso xonimni qabul qildi
- “2030-yilga borib O‘zbekiston aholisi o‘rtadan yuqori daromad oluvchi davlatlar qatorida bo‘lishiga erishishni maqsad qilganmiz” — Shavkat Mirziyoyev
- Shavkat Mirziyoyev Investitsiyalar vazirligi hamda Kambag‘allikni qisqartirish vazirligi tashkil etilganidan buyon qanday natijalarga erishilgani haqida gapirdi
Izoh (0)