Bahor valsiga xirom aylayotgan andijonlik raqqosalar, xorijliklarni o‘ynatgan buxorocha kuy — Andijon va Buxoroda Navro‘z (foto, video)

Barcha viloyatlarda bo‘lgani kabi sharqona yangi yil — Navro‘z ayyomi Andijon va Buxoro viloyatlarida ham ko‘tarinki kayfiyatda nishonlandi. Har ikki viloyatning barcha shahar va tumanlarida, korxona va tashkilotlar, muassasa va mahallalarda konsert dasturlari, sayillar va sport bellashuvlari o‘tkazildi. Viloyatning markaziy tadbiri va hududlarda o‘tkazilgan Navro‘z tantanalarida ishtirok etgan “Daryo” muxbirlari bayram sayillarining eng qiziq jihatlarni tasvirga oldi.

Andijondagi bayram dasturlarida xalq o‘yinlari, folklor san’atining eng sara namunalari, o‘lan-laparlar, badiiy havaskorlik jamoalari, dorbozlar, sirk artistlari, oilaviy ansambllar, baxshilar, shoirlar o‘z chiqishlarini namoyon qildi. Qolaversa, hunarmandchilik ko‘rgazmalari o‘tkazildi.

Viloyatning asosiy tadbiri Andijon shahridagi Olimpiya zaxiralari sport kollejida bo‘lib o‘tdi. Bayram tadbirida taniqli san’atkorlar, yosh ijrochilar, folklor guruhlari, badiiy havaskorlik jamoalari tomonidan xalqona kuy-qo‘shiqlar, o‘lan-laparlar aytildi. Viloyat bo‘ylab o‘tgan bayram tadbirlarda Sanobar Rahmonova, Ilhom Jo‘rayev, Mansurxon Nurmatov, Bahrom Nazarov, Abror Azizov, G‘anisher Abdullayev kabi san’atkorlar ishtirok etdi.

Bayram munosabati bilan Baliqchi tuman markaziy madaniyat va istirohat bog‘ida tuman hokimi sovrini uchun belbog‘li kurash bo‘yicha musobaqa o‘tkazildi. Ushbu musobaqada respublika bo‘yicha hamda qo‘shni Qirg‘izistondan kelgan yuzga yaqin polvonlar bellashdi.

Murosasiz bahslarda mutlaq g‘olib deb topilgan baliqchilik Muhammadjon Iskandarovga tuman hokimining bosh sovrini — toychoq topshirildi.

Andijonda Navro‘z bayramiga bag‘ishlangan sayillar va tadbirlar davom etmoqda.

Buxoro viloyatida ham Navro‘z bayramining asosiy tadbiri Buxoro shahridagi Yoshlar markazida bo‘lib o‘tdi. Yoshlar markazi joylashgan hudud oldidagi maydon bayramona bezatilib, yarmarkalar va ko‘rgazmalar tashkil etildi.

Viloyat tadbirida so‘z olgan Buxoro hokimi Botir Zaripov yig‘ilganlarni yasharish va yangilanish ayyomi bilan samimiy tabriklar ekan, joriy yilda ob-havoning noqulay kelgani bois, “Navro‘z” sayllari ochiq maydonlarda tashkil etilmaganini ta’kidladi.

Milliy urf-odatlar, an’analar, qadriyatlar namoyishiga aylangan mazkur tadbirda milliy madaniy markazlar faol ishtirok etgan. Ko‘rgazma va yarmarkalar tashkil etildi. Ayniqsa, tantanada xorijlik sayyohlarning ham jalb etilgani bayram kayfiyatini yanada oshirgan.

“Bu mening Buxoroga ikkinchi marotaba kelishim. To‘g‘risi, pandemiyadan buyon bunday ko‘tarinki kayfiyatdagi marosimlarda qatnashmagan ekanman. Xursand bo‘ldim. Miriqib raqsga tushdim”, — deydi germaniyalik sayyoh Blum Yellin.

Kanadadan kelgan Ian Garet O‘zbekistonning milliy bayrami unga iliq taassurot qoldirganini bildirdi.

“O‘zbekiston — umumiy uyimiz! Buxoro sharif ham shu mustahkam uyning yuragi. Buxoroda kechadigan hech bir bayram xorijlik sayyohlarsiz o‘tmaydi. Bugun ham Navro‘zni ular bilan birgalikda nishonlayapmiz. Tinch va osoyishta yurtimizga bayramlar yarashadi. O‘zbekona aytganda, boshimiz to‘ydan chiqmasin”, — deydi viloyat Madaniyat boshqarmasi boshlig‘i Shavkat Rahmonov.