Баҳор валсига хиром айлаётган андижонлик раққосалар, хорижликларни ўйнатган бухороча куй — Андижон ва Бухорода Наврўз (фото, видео)

Барча вилоятларда бўлгани каби шарқона янги йил — Наврўз айёми Андижон ва Бухоро вилоятларида ҳам кўтаринки кайфиятда нишонланди. Ҳар икки вилоятнинг барча шаҳар ва туманларида, корхона ва ташкилотлар, муассаса ва маҳаллаларда концерт дастурлари, сайиллар ва спорт беллашувлари ўтказилди. Вилоятнинг марказий тадбири ва ҳудудларда ўтказилган Наврўз тантаналарида иштирок этган «Дарё» мухбирлари байрам сайилларининг энг қизиқ жиҳатларни тасвирга олди.

Андижондаги байрам дастурларида халқ ўйинлари, фолклор санъатининг энг сара намуналари, ўлан-лапарлар, бадиий ҳаваскорлик жамоалари, дорбозлар, цирк артистлари, оилавий ансамбллар, бахшилар, шоирлар ўз чиқишларини намоён қилди. Қолаверса, ҳунармандчилик кўргазмалари ўтказилди.

Вилоятнинг асосий тадбири Андижон шаҳридаги Олимпия захиралари спорт коллежида бўлиб ўтди. Байрам тадбирида таниқли санъаткорлар, ёш ижрочилар, фолклор гуруҳлари, бадиий ҳаваскорлик жамоалари томонидан халқона куй-қўшиқлар, ўлан-лапарлар айтилди. Вилоят бўйлаб ўтган байрам тадбирларда Санобар Раҳмонова, Илҳом Жўраев, Мансурхон Нурматов, Баҳром Назаров, Аброр Азизов, Ғанишер Абдуллаев каби санъаткорлар иштирок этди.

Байрам муносабати билан Балиқчи туман марказий маданият ва истироҳат боғида туман ҳокими соврини учун белбоғли кураш бўйича мусобақа ўтказилди. Ушбу мусобақада республика бўйича ҳамда қўшни Қирғизистондан келган юзга яқин полвонлар беллашди.

Муросасиз баҳсларда мутлақ ғолиб деб топилган балиқчилик Муҳаммаджон Искандаровга туман ҳокимининг бош соврини — тойчоқ топширилди.

Андижонда Наврўз байрамига бағишланган сайиллар ва тадбирлар давом этмоқда.

Бухоро вилоятида ҳам Наврўз байрамининг асосий тадбири Бухоро шаҳридаги Ёшлар марказида бўлиб ўтди. Ёшлар маркази жойлашган ҳудуд олдидаги майдон байрамона безатилиб, ярмаркалар ва кўргазмалар ташкил этилди.

Вилоят тадбирида сўз олган Бухоро ҳокими Ботир Зарипов йиғилганларни яшариш ва янгиланиш айёми билан самимий табриклар экан, жорий йилда об-ҳавонинг ноқулай келгани боис, «Наврўз» сайллари очиқ майдонларда ташкил этилмаганини таъкидлади.

Миллий урф-одатлар, анъаналар, қадриятлар намойишига айланган мазкур тадбирда миллий маданий марказлар фаол иштирок этган. Кўргазма ва ярмаркалар ташкил этилди. Айниқса, тантанада хорижлик сайёҳларнинг ҳам жалб этилгани байрам кайфиятини янада оширган.

«Бу менинг Бухорога иккинчи маротаба келишим. Тўғриси, пандемиядан буён бундай кўтаринки кайфиятдаги маросимларда қатнашмаган эканман. Хурсанд бўлдим. Мириқиб рақсга тушдим», — дейди германиялик сайёҳ Блум Еллин.

Канададан келган Иан Гарет Ўзбекистоннинг миллий байрами унга илиқ таассурот қолдирганини билдирди.

«Ўзбекистон — умумий уйимиз! Бухоро шариф ҳам шу мустаҳкам уйнинг юраги. Бухорода кечадиган ҳеч бир байрам хорижлик сайёҳларсиз ўтмайди. Бугун ҳам Наврўзни улар билан биргаликда нишонлаяпмиз. Тинч ва осойишта юртимизга байрамлар ярашади. Ўзбекона айтганда, бошимиз тўйдан чиқмасин», — дейди вилоят Маданият бошқармаси бошлиғи Шавкат Раҳмонов.