“Bugunga qadar tadbirkorlarni qo‘llab-quvvatlash shtabiga kelib tushgan 1150 dan ko‘proq murojaatlarning 305 tadan ortig‘i ijobiy hal etilgan” — Investitsiyalar va tashqi savdo vazirligi

Investitsiyalar va tashqi savdo vazirligida tadbirkorlarni qo‘llab-quvvatlash bo‘yicha shtabiga bugungi kunga qadar 1150 dan ortiq murojaatlar kelib tushgan. Bu haqda Investitsiyalar va tashqi savdo vazirining birinchi o‘rinbosari Aziz Voitov jurnalistlarga bergan intervyusida ma’lum qildi, deb xabar bermoqda “Daryo” muxbiri.

Uning so‘zlariga ko‘ra, davlat rahbari boshchiligida barcha vazirlik-idoralar, iqtisodiyot kompleksidagi tashkilotlar bilan birgalikda hozirgi vaziyatdan kelib chiqib iqtisodiyotning o‘sishini ta’minlash, yalpi ichki daromadni, aholi daromadlarini oshirish va tadbirkorlik muhitini qo‘llab-quvvatlash bo‘yicha doimiy tarzda yig‘ilishlar o‘tkazilmoqda.

Mazkur yig‘ilishlarda asosiy muhokama qilinayotgan mavzular — tadbirkorlar tomonidan taklif etilayotgan yoki muammosi ko‘tarilib, tizimli ravishda tashkil qilinayotgan masalalar o‘rganib chiqilmoqda. Jumladan, Investitsiyalar va tashqi savdo vazirligida barcha vazirlik-idoralar xodimlaridan iborat “Tadbikorlarni qo‘llab-quvvatlash shtabi” tashkil etilgan. Savdo-sanoat palatasi bilan birgalikda 24 soat ishlaydigan Call-markazlar tashkil qilingan va tadbikorlar tomonidan hozirgi vaziyatdan kelib chiqib, ularni qiynagan masalalar, muammolar, takliflar va tizimli yechimlar bo‘yicha murojaatlar kelib tushyapti. Hozirgi kunga qadar 1150 dan ortiq murojaatlar kelib tushgan, ularning 305 tadan ortig‘i ijobiy hal etilgan.

Murojaat qilinayotgan masalalarga to‘xtalsak, xorijiy hamkor topishda yoki import xomashyosini olib kelishdagi muammolar, bundan tashqari, eksport bozorlarini topish, kredit muddatini uzaytirish kabi murojaatlar kelib tushyapti. Shuni aytish kerakki, tadbirkorlardan kelib tushgan murojaatlarni barcha vazirlik-idoralar bilan birgalikda yechimini topib, bu borada birga ishlayapmiz va tizimli takliflarni davlatimiz rahbariga beryapmiz. U yerda barcha masalalar qo‘llab-quvvatlanyapti, jumladan, transport xarajatlari masalasida. Hozir ba’zi tadbirkorlarimiz eksportga chiqayotganda transport-logistika xarajatlari oshyapti, ya’ni ular boshqa transport koridorlardan foydalanyapti. Xarajatlarni kamaytish maqsadida tadbirkorlarning transport xarajatlarini 70 foizgacha qoplash bo‘yicha topshiriq berildi. Hozirda bu boradagi qaror loyihasi bo‘yicha ishlayapmiz. Bundan tashqari, Kaspiy dengizidagi yuk tashishlaridagi xarajatlarni 50 foizgacha kamaytirish bo‘yicha boshqa mamlakatlar bilan kelishib olindi. Shuningdek, Ozarbayjon, Bokudan keladigan yuklar bo‘yicha 30 foizgacha chegirmalar olish uchun hamkor davlatlar bilan kelishib olindi.

Qo‘shimcha ravishda boshqa transport koridorlari bo‘yicha ish olib borilyapti. Jumladan, 16-mart kuni Mumbay portidan Hindiston—Pokiston—Afg‘oniston—O‘zbekiston yo‘nalishida ilk karvon — shakar mahsulotlari kirib kelishi yo‘lga qo‘yildi. Davlat rahbari boshchiligida bo‘lib o‘tgan yig‘ilishda ichki temir yo‘l transport xarajatlarini qisqartirish bo‘yicha chora-tadbir amalga oshirish topshirig‘i berildi. Bundan tashqari, tadbirkorlarning mavjud xorijiy valyutadagi kreditlarini foiz yukini oshirmaslik harakatlarini ko‘rish hamda imtiyozli kreditlash bo‘yicha topshiriq berildi”.