Oliy Majlis Qonunchilik palatasining 16-mart kuni o‘tkazilgan majlisida deputatlar siyosiy partiyalarning 2021-yildagi faoliyatini moliyalashtirish manbalari to‘g‘risidagi hisobotlarini eshitdi. Bu haqda parlament quyi palatasi matbuot xizmati xabar berdi.
Majlisda siyosiy partiyalarning roli tobora kuchaytirilishi ular faoliyatida moliyaviy intizomni yanada mustahkamlashga e’tibor qaratishni talab etishi ta’kidlangan. “Bu esa siyosiy partiyalar tasarrufiga davlat budjetidan kelib tushadigan mablag‘lar xarajatlarini to‘g‘ri rejalashtirish, maqsadli sarflashni taqozo etadi”, — deyiladi xabarda.
“Siyosiy partiyalarni moliyalashtirish to‘g‘risida”gi qonunga binoan siyosiy partiya Oliy Majlisning Qonunchilik palatasidagi deputatlik o‘rinlari soniga qarab o‘z ustav faoliyatini moliyalashtirish uchun davlat tomonidan moliyalashtirish mablag‘larini olish huquqiga ega.
Oliy Majlis Qonunchilik palatasi deputati Rasul Kusherbayev 2021-yilda O‘zbekistondagi siyosiy partiyalarga davlat budjetidan qancha mablag‘ ajratilganini ma’lum qildi.
Unga ko‘ra, 2021-yil davomida eng ko‘p mablag‘ — 36,56 milliard so‘m O‘zLiDeP partiyasiga ajratilgan. Keyingi o‘rinda “Milliy tiklanish” demokratik partiyasi — 25,8 milliard so‘m.
“Adolat” sotsial-demokratik partiyasiga 2021-yilda davlat budjeti hisobidan 17 milliard so‘mdan ortiq mablag‘ ajratilgani ma’lum bo‘ldi.
Shuningdek, o‘tgan yili Xalq demokratik partiyasiga 16,4 milliard so‘m, Ekologik partiya esa 12,8 milliard so‘m ajratilgan.
Izoh (0)