Buxoro viloyatining G‘ijduvon tumanida xotinini qasddan o‘ldirgan er 13 yilga qamaldi. Bu haqda “Daryo”ga Jinoyat ishlari bo‘yicha Vobkent tumani sudi raisi Akrom Rahimov ma’lum qildi.
Sud hujjatlariga ko‘ra, voqea 2021-yilning 27-noyabr kuni soat 10:30 da sodir bo‘lgan.
G‘ijduvon tumanining “Zarangari” mahallasi Kalon qishlog‘ida yashovchi 46 yoshli Z.R. voqeadan bir kun ilgari, ya’ni 26-noyabr kuni ukasi K.R.ning tug‘ilgan kuniga bora olmagani uchun 27-noyabr tongida uning xonadoniga borgan. Mehmon va mezbon spirtli ichimlik iste’mol qilgan. Mast holda uyiga qaytgan va turmush o‘rtog‘i V.R. bilan o‘zaro kelishmovchilik sabab janjallashib qolgan Z.R. o‘g‘lini hovlidagi yerni ag‘darish uchun, qizini esa do‘kondan sigaret olib kelish uchun uydan chiqarib yuborgan. Farzandlari chiqib ketgach Z.R. oshxonada turgan aroqni ichib, xotinidan ham uydan chiqib ketishni talab qilgan. Uni yoqtirmasligini, birga yashash istagi yo‘qligini, chiqib ketmasa, uni o‘ldirishini aytgan. Ayol esa jahl ustida erini sensirab, hech qayerga ketmasligini, unga uydan o‘zi chiqib ketishi kerakligini aytgan.
Er esa unga “Ikki marta qamalib chiqqanman. Seni ham o‘ldiraman va sendan qutulaman. Uzog‘i bilan to‘rt-besh yil qamoqda o‘tirib, yana qaytib chiqaman”, deya xotinining chap tomon ko‘krak qismiga pichoq bilan urib, uni o‘ldirgan.
“Avvaliga xotinimning o‘lganini bilmadim. Farzandlarimni baqirib chaqirdim. Onalarini pichoqlab qo‘yganimni, zudlik bilan tez yordam va IIB xodimlariga qo‘ng‘iroq qilishlarini so‘radim. Afsuski, kech bo‘lgan ekan”, — deydi sudda so‘z olgan ayblanuvchi.
Sudda qayd etilishicha, xotinini o‘ldirgan er 2002-yil Jinoyat kodeksining 164-moddasi (bosqinchilik) bilan ayblanib, 5 yil muddatga qamalgan. 2016-yilda esa Jinoyat kodeksining 270-moddasi (taqiqlangan ekinlarni yetishtirish) bilan aylanib, bir yil muddatga axloq tuzatish bilan jazolangan.
Sud majlisida so‘z olgan marhumaning onasi kuyovi qizini qasddan o‘ldirganini, unga qonuniy jazo berilishi lozimligini so‘ragan.
Jinoyat ishlari bo‘yicha Vobkent tuman sudi hukmiga ko‘ra, ayblanuvchi Z.R. Jinoyat kodeksining 97-moddasi 1-qismi (qasddan odam o‘ldirish) bilan aybli deb topilgan va unga 13 yil muddatga ozodlikdan mahrum qilish jazosi tayinlangan.
Izoh (0)