Adliya vaziri tomonidan “Notariuslar tomonidan amalga oshiriladigan huquqiy va texnik tusdagi qo‘shimcha harakatlar uchun undiriladigan to‘lovlarning maksimal miqdorlariga o‘zgartirish kiritish to‘g‘risida”gi buyruq imzolandi, deb xabar beradi Norma.
Hujjat prezidentning 2018-yil 13-apreldagi “O‘zbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar to‘g‘risida”gi PQ-3666-son qarori hamda Vazirlar Mahkamasining 2020-yil 16-martdagi “Nodavlat notarial faoliyatni tartibga soluvchi normativ-huquqiy hujjatlarni tasdiqlash to‘g‘risida”gi 156-son qaroriga muvofiq qabul qilingan.
Shunday qilib, garov (ipoteka) va lizing shartnomalarini tasdiqlash uchun haq miqdori barcha shaxslar uchun BHMning 10 foizigacha (27 ming so‘m) kamaytirildi. Ilgari jismoniy shaxslar uchun 20 foiz va agar bitta tomon yuridik shaxs bo‘lsa — BHMning 50 foizni tashkil qilgan.
O‘z navbatida, meros ishi bo‘yicha tushuntirishlar berish uchun to‘lanadigan haq miqdori ikki baravar ko‘paydi va endi BHMning 20 foizini (54 ming so‘m) tashkil qiladi.
Shuningdek, notarial tasdiqlanadigan hujjatlar loyihalarini tayyorlash tartibiga quyidagi o‘zgartirishlar kiritilgan:
- garov (ipoteka) va lizing shartnomalari loyihalarini tayyorlash uchun to‘lanadigan haq miqdori. Jismoniy shaxslar uchun (hamda bitta taraf jismoniy shaxs bo‘lsa) bu miqdor BHMning 15 foizini (40,5 ming so‘m) tashkil etadi. Ilgari bu haq ikki baravar ko‘proq edi va 30 foizni tashkil qilgan. Agar shartnomaning ikki tarafi yuridik shaxslar bo‘lsa, haq miqdori BHMning 100 foizini (270 ming so‘m) tashkil qiladi, oldingi tahririda bu miqdor tomonlardan biri yuridik shaxs bo‘lgan taqdirda qo‘llangan;
- barcha shaxslar (yuridik va jismoniy) uchun mulkni ijaraga berish shartnomalarini tayyorlash uchun haq miqdori BHMning 20 foizini (54 ming so‘m) tashkil qiladi. Ilgari bu miqdor shartnoma taraflari kimligiga qarab farqlanardi. Jismoniy shaxslar uchun — 20 foiz, tomonlardan biri yuridik shaxs bo‘lsa — 50 foiz;
- merosga bo‘lgan huquq to‘g‘risida guvohnoma loyihasini tayyorlash uchun endi BHMning 100 foizi (270 ming so‘m) undiriladi. Ilgari bu miqdor 20 foizni tashkil qilgan.
Hujjat qonun hujjatlari ma’lumotlari milliy bazasida e’lon qilingan va 15-martdan kuchga kirgan.
Avvalroq O‘zbekistonda avtomobilni auksion orqali ijaraga berishda shartnomani notarial tasdiqlash bekor qilingani, O‘zbekistonda ilk bor notarial harakat onlayn tarzda amalga oshirilgani to‘g‘risida xabar berilgandi.
Izoh (0)