OKMK mutaxassislari Andijon mexanika zavodi bilan hamkorlikda O‘zbekistonda birinchi marotaba 15—1482 modelidagi ixtisoslashtirilgan yuk vagonining yangi turini ishlab chiqarishni o‘zlashtirishdi.
Ma’lumki, sanoatning texnologik jarayonlarida, xususan, konlarda portlatish ishlarida kimyoviy moddalar qo‘llaniladi. Ularni tashish uchun ixtisoslashagan yuk vagonlariga bugun talab katta.
Kimyoviy reagentlarga bo‘lgan talabning ortishi, shuningdek, valyuta mablag‘larini tejash maqsadida, kombinat rahbariyati tomonidan ammiakli selitrani tashish uchun mo‘ljallangan vagon-sisternani mahalliy ishlab chiqaruvchilar bilan hamkorlikda O‘zbekistonda ishlab chiqarish va xarid qilish masalasi o‘rganib chiqildi.
OKMK temir yo‘l transporti va logistikasi bo‘limi boshlig‘i Umar Mavlyanqulovning ma’lumotiga ko‘ra, o‘tgan 2021-yilning oxirida temir yo‘l transporti va logistikasi bo‘limi va OKMK portlatish materiallari zavodi mutaxassislari Andijon mexanika zavodi vakillari bilan birgalikda sisterna ishlab chiqarish uchun zarur texnik iqtisodiy asoslar o‘rganib chiqildi. Vagon-sisternaning portlovchi moddalar reagentlari tashilishi inobatga olinib, xavfsizlik talablari hisobga olindi. Ammiakli selitrani tashish uchun izotermik vagon-sisternani ishlab chiqarish bo‘yicha texnik hujjatlar va texnik yechimlar, konstruktorlik va texnologik chizmalar ishlab chiqilib, kelishildi.
E’tiborlisi, bunday vagon-sisternani O‘zbekistonda ilk marotaba ishlab chiqarilmoqda.
Joriy yilning fevral oyi yakunida, birinchi vagon-sisterna kombinat temir yo‘llarga yetib keldi va foydalanishga topshirildi. Endilikda bu vagon-sisternalar kombinatning “Qalmoqqir” va “Yoshlik-1” koniga kimyoviy moddalarni o‘z vaqtida yetkazilishini ta’minlaydi.
Ma’lumot sheriklik huquqi asosida tayyorlandi.
Izoh (0)