Navoiy viloyatida mast holatda kuyovini pichoqlab o‘ldirgan qaynotaga nisbatan chiqarilgan sud hukmi o‘zgarishsiz qoldirildi. Bu haqda “Milliy” telekanali orqali efirga uzatilgan lavhada ma’lum qilindi.
Ma’lum qilinishicha, 2021-yilning 26-iyul kuni soat 01:00 larda mast holatda bo‘lgan qaynota nabiralarini olib kelish uchun kuyovining uyiga kelgan. Ikki erkak o‘rtasida yuzaga kelgan tortishuv oqibatida kuyov qaynotani itarib yuborgan. Qaynota esa pichoq bilan uning hayoti uchun muhim bo‘lgan tana a’zolariga bir necha marotaba jarohat yetkazib, uning o‘limiga sababchi bo‘lgan.
2022-yilning 18-yanvar kuni Karmana tuman sudida hukm o‘qilib, sudlanuvchiga nisbatan 10 yil muddatga qamoq jazosi tayinlangan. Ammo sud hukmidan norozi bo‘lgan 65 yoshli sudlanuvchining shikoyat arizasi bilan Navoiy viloyat sudida hukm qaytadan ko‘rib chiqilgan.
Navoiy viloyat sudining ajrimiga ko‘ra jinoyat ishlari bo‘yicha Karmana tuman sudining hukmi bilan kuyovining qotiliga aylangan qaynotaga tayinlangan 10 yil muddatga ozodlikdan mahrum qilish jazosi o‘zgarishsiz qoldirilgan.
Avvalroq Andijonda uyiga kelib janjallashgan qaynopasini pichoqlab, o‘ldirgan yigitga sud hukmi o‘qilgani, Navoiyda uxlab yotgan erini bolta bilan chopib tashlagan ayol 16 yilga qamalgani, Buxoroda mast ota o‘ziga tanbeh bergan 18 yoshli o‘g‘lini pichoqlab o‘ldirgani to‘g‘risida xabar berilgandi.
Izoh (0)