1-mart kuni Turkmaniston prezidenti vazifasini bajaruvchi Gurbanguli Berdimuhamedov birinchi chaqiriq Xalq Maslahati a’zolari, parlament deputatlari bilan uchrashuv o‘tkazdi. Bu haqda “Turkmenistan segodnya” davlat axborot agentligi xabar berdi.
Uchrashuvda Gurbanguli Berdimuhamedov Turkmaniston konstitutsiyasi va davlat bayrog‘i qabul qilinganiga 30 yil to‘lishini ta’kidlagan.
Prezident vazifasini bajaruvchi, shuningdek, 2020-yilda mamlakatning asosiy qonuniga o‘zgartirish va qo‘shimchalar kiritilganini eslatib o‘tgan: ikki palatali parlament tashkil etilgan va Xalq Maslahatiga a’zolik uchun saylovlar o‘tkazilgan. 25-sentabr kuni Turkmanistonga konstitutsiyaning to‘qqizinchi tahriri qabul qilingan.
Shundan so‘ng Berdimuhamedov Turkmaniston qonunchiligi “davr talablari asosida muntazam takomillashtirilayotgani” haqida gapirib, konstitutsiyani “qudratli davlatning uyg‘onish davrida davlatni rivojlantirish vazifalaridan kelib chiqib takomillashtirish zarurligini” ham qayd etgan.
Turkmanistonda mamlakatni rivojlantirishning keyingi 30 yilligi (2022-yildan 2052-yilga qadar) “Qudratli davlatning yangi uyg‘onish davri” deya e’lon qilingan. Hozirda mamlakatda 2012-yilning fevralida boshlangan “Qudrat va baxt davri” o‘tmoqda.
Berdimuhamedov yig‘ilganlarga mamlakat konstitutsiyasini takomillashtirish bo‘yicha takliflarni ishlab chiqishda davlat organlarining vakolatlari, huquq va majburiyatlarini ko‘rib chiqishni topshirgan.
Eslatib o‘tamiz, 11-fevral kuni Turkmaniston parlamenti oliy palatasining navbatdan tashqari yig‘ilishida mamlakatni 15 yildan beri boshqarib kelayotgan Gurbanguli Berdimuhamedov rahbarlikni yoshlarga topshirish va faoliyatini Xalq maslahati raisi sifatida davom ettirish niyatini ma’lum qildi.
15-fevral kuni Berdimuhamedovning o‘g‘li, iqtisodiyot bo‘yicha bosh vazir o‘rinbosari Serdar Berdimuhamedov bo‘lajak saylovlarda mamlakat prezidentligiga birinchi nomzod sifatida ko‘rsatildi. Keyinroq turkman muxolifatining xorijdagi vakillari ham prezidentlik saylovlarida qatnashish istagini bildirgandi. Ular onlayn ovoz berish usulini taklif qilgan.
Turkmanistonda muddatidan oldin prezidentlik saylovlari 2022-yilning 12-martiga belgilangan. Hozirda Turkmaniston prezidentligiga nomzodlar soni 9 kishiga yetgan.
Izoh (0)