Xorijdagi turkman muxolifati vakillari ham prezidentlikka nomzodini qo‘ymoqchi. Ular onlayn ovoz berish usulini taklif qilmoqda

Turkmanistonda prezidentlikka nomzodlarni ro‘yxatga olish davom etmoqda. 16-fevral kuni Markaziy saylov komissiyasi Agrar partiyadan ko‘rsatilgan Agadjan Bekmiradovning nomzodini ro‘yxatga olgandi. Shuningdek, turkman muxolifatining xorijdagi vakillari ham prezidentlik saylovlarida qatnashish istagini bildirdi.

Turkmanistonlik taniqli otboqar, sobiq siyosiy mahkum Geldi Kyarizov muqobil saylovlar va elektron ovoz berishni o‘tkazish niyati borligini ma’lum qildi. Ayni paytda u “Turkmaniston fuqarolarining huquq va erkinliklari” inson huquqlari tashkilotining a’zosi.

Ovoz berishni qanday tartibda o‘tkazish rejalashtirilgani hozircha noma’lum. “Biz hozir saylovchilarimiz xavfsizligini ta’minlash uchun xavfsiz dasturni topish ustida ishlayapmiz”, — dedi Kyarizov o‘z bayonotida.

Nomzodning tarjimai holi Turkmenyurt saytiga joylangan.

“Azatlik” radiosining xabar berishicha, “Turkmaniston demokratik saylovi” muxolifat harakati rahbari Murod Qurbonov ham saylovda ishtirok etish niyatida. U Telegram, Imo, WhatsApp messenjerlarida, shuningdek, YouTube va Facebook ijtimoiy tarmoqlarida muqobil ovoz berishni o‘tkazish rejalari haqida gapirgan.

Qurbonovning so‘zlariga ko‘ra, bu aksiya Turkmaniston saylovlaridagi noqonuniyliklarni ochib berishi kerak.

Turkmaniston konstitutsiyasiga muvofiq so‘nggi 15 yil davomida mamlakatda doimiy yashab, faoliyat yuritib kelayotgan fuqarolargina prezidentlik saylovida qatnashishi mumkin. Bu qoida muqobil muxolifat nomzodlarini prezidentlik uchun ariza berish imkoniyatidan mahrum qiladi. Rejimning o‘ta repressiv tabiati tufayli Turkmanistonda muxolif partiyalar ham, siyosatchilar ham yo‘q. Hozirgi hukumatning siyosiy muxoliflari mamlakatni tark etishga majbur bo‘lgan.

Eslatib o‘tamiz, 11-fevral kuni Turkmaniston parlamenti oliy palatasining navbatdan tashqari yig‘ilishida mamlakatni 15 yildan beri boshqarib kelayotgan Gurbanguli Berdimuhamedov rahbarlikni yoshlarga topshirish va faoliyatini Xalq maslahati raisi sifatida davom ettirish niyatini ma’lum qildi.

15-fevral kuni Berdimuhamedovning o‘g‘li, iqtisodiyot bo‘yicha bosh vazir o‘rinbosari Serdar Berdimuhamedov bo‘lajak saylovlarda mamlakat prezidentligiga birinchi nomzod sifatida ko‘rsatildi.