Shavkat Mirziyoyev raisligida 1-mart kuni xotin-qizlarni qo‘llab-quvvatlash tizimini yangi bosqichga ko‘tarish va ayollarning jamiyatdagi o‘rnini yanada yuksaltirish va mustahkamlash yuzasidan videoselektor yig‘ilishi o‘tkazildi. Unda Oila va xotin-qizlar davlat qo‘mitasiga rahbar tayinlandi.
Qayd etilishicha, prezident xotin-qizlarni qo‘llab-quvvatlash sohasining yangi tizimini belgilab bergan.
“Yangi O‘zbekiston taraqqiyot strategiyasida ham ayollarga munosib sharoit yaratish, ularning tashabbuslarini qo‘llab-quvvatlash masalasini eng muhim yo‘nalishlardan biri sifatida bejizga belgilamadik. Ushbu muhim vazifalar ijrosini tizimli tarzda har bir mahalla kesimida amalga oshirishni ta’minlash maqsadida bugun Oila va xotin-qizlar davlat qo‘mitasini tashkil etish bo‘yicha farmonni imzoladim. Qo‘mita rahbari lavozimiga ayollarning muammolari, dard- u tashvishi bilan yaqindan tanish va ularni hal qilish bo‘yicha katta tajribaga ega bo‘lgan To‘raqo‘rg‘on tumani hokimi Zulayho Baxriddinovna Mahkamova tayinlandi”, — deydi prezident.
Yangi qo‘mita raisi Mahkamova Bosh vazir o‘rinbosari va Senat a’zosi sifatida faoliyat yuritadi. Joylarda qo‘mitaning viloyat, tuman va shahar rahbarlari esa hokim o‘rinbosari bo‘ladi. Yangi qo‘mita Xotin-qizlarni qo‘llab-quvvatlash jamg‘armasi hamda “Ayollar daftari” jamg‘armasini o‘zi boshqaradi.
Izoh (0)