Ukraina Rossiya ustidan da’vo arizasi bilan Gaagadagi Birlashgan Millatlar Tashkilotining Xalqaro sudiga shikoyat qildi. Bu haqda Ukraina prezidenti Vladimir Zelenskiy Twitter’da yozdi.
“Ukraina Gaagadagi BMT Xalqaro sudiga Rossiyaga qarshi da’vo arizasini rasman yubordi. Biz Rossiyaning o‘z tajovuzini oqlash maqsadida genotsid tushunchasini buzib ko‘rsatgani uchun javobgarlikka tortilishini talab qilamiz”— deyiladi bayonotda. Unga ko‘ra, Kiyev suddan Rossiyaga Ukrainadagi maxsus operatsiyani to‘xtatish bo‘yicha zudlik bilan buyruq berishni hamda kelayotgan haftadanoq sud majlislarini boshlashni so‘ramoqda.
Xalqaro Sud Birlashgan Millatlar Tashkilotining asosiy sud organi hisoblanadi. U Gaagadagi (Niderlandiya) Tinchlik saroyida joylashgan bo‘lib, 1946-yildan beri faoliyat yuritadi va xalqaro huquq normalariga muvofiq davlatlar o‘rtasidagi huquqiy nizolarni hal qiladi.
Nizolarni ko‘rib chiqishda sud ochiq sud majlislarini o‘tkazadi, unda taraflarning vakillari va advokatlari so‘zga chiqadi, so‘ngra ishni yopiq majlislarda muhokama qiladi va qarorini e’lon qiladi. Ushbu qaror yakuniy hisoblanadi va shikoyat qilinishi mumkin emas. Agar jarayonda ishtirok etuvchi davlatlardan biri unga rioya qilmasa, ikkinchi tomon BMT Xavfsizlik Kengashiga murojaat qilishi mumkin.
2017-yilda Ukraina Xalqaro sudga Rossiyaning Donbassdagi xatti-harakatlarini Terrorizmni moliyalashtirishga qarshi kurash bo‘yicha xalqaro konvensiyani, Qrimdagi harkatlarini esa irqiy kamsitishning barcha shakllariga barham berish to‘g‘risidagi xalqaro konvensiyani buzish deya tan olishni talab qilib da’vo arizasi bilan chiqqan edi. Hozircha bu ish bo‘yicha yakuniy qaror qabul qilinmagan.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)