Австралия Россиянинг Украинадаги ҳарбий операцияси туфайли Россия президенти Владимир Путин ва мамлакатнинг бошқа юқори мартабали амалдорларига қарши санкциялар жорий этди. Бу ҳақда Австралия бош вазири Скотт Моррисон маълум қилди.
Шунингдек, Россия мудофаа вазири Сергей Шойгу, ташқи ишлар вазири Сергей Лавров, бош вазир Михаил Мишустин ва ички ишлар вазири Владимир Колоколсевга қарши ҳам чекловлар жорий этилган. Уларнинг барчаси мамлакат Хавфсизлик кенгаши аъзолари бўлиб, ДХР ва ЛХРнинг мустақиллигини тан олиш масаласи бўйича ўтказилган очиқ йиғилишда иштирок этган.
Ушбу чоралар Австралияга киришни тақиқлаш ва мақсадли молиявий санкцияларни ўз ичига олади.
«Австралия иттифоқчилари ва ҳамфикр давлатлар билан Россияга қарши қўшимча иқтисодий санкциялар қўллаш борасида ишлашни давом этади», — дея ваъда берган Моррисон. Унинг эслатишича, ҳозирда 350 нафардан ортиқ россиялик, хусусан, олигархлар, депутат ва ҳарбийларга чеклов қўлланилган. Бундан ташқари, Канберра Беларуснинг 13 нафар жисмоний ва юридик шахсларига, жумладан, мудофаа вазири Виктор Хренинга нисбатан санкциялар қўллаган.
Моррисоннинг қўшимча қилишича, Австралия Россиянинг Марказий банки ва қатор молиявий ташкилотларини SWIFT’дан узиш борасидаги Европа Иттифоқи ва АҚШнинг чораларини қўллаб-қувватлайди.
24 февраль куни Россия Украинага нисбатан ҳужумни бошлаганидан кейин, Австралия бош вазири Скотт Моррисон мамлакат бир қатор россиялик жисмоний шахсларга қарши санкциялар қўлланилишини маълум қилганди. «Даставвал биз Россия Хавфсизлик кенгашининг саккиз аъзосини мамлакатга киришини тақиқлаш ва мақсадли молиявий санкцияларни жорий этамиз», — деганди Моррисон. Шу билан бирга, ҳукумат «Қрим ва Севастополга қарши» амалдаги санкцияларни кенгайтирган: эндиликда улар «Донецк ва Луганск ҳудудларига» ҳам тааллуқли.
Россия—Украина урушига оид тезкор, ишончли янгиликлар ва маълумотларни Дарйўнинг ливе саҳифаси орқали кузатиб боринг → @Daryo_Live
Изоҳ (0)