Toshkent shahrining Yashnobod tumanida 21 yoshli yigit mast holda tanishini pichoqlab qo‘ydi, deb xabar beradi Tergov departamenti.
Ma’lum qilinishicha, 10-fevral kuni soat 00:30 larda tumanning Ohangrabo ko‘chasida yashovchi 21 yoshli B.I. tanishi — 20 yoshli B.R.ning uyiga mehmonga kelgan. Ular birgalashib spirtli ichimliklar iste’mol qilib, o‘rtalarida kelib chiqqan janjal oqibatida B.I. mezbon tanasining turli joylariga pichoq bilan tan jarohati yetkazgan.
Olgan tan jarohatlari oqibatda R.B. 4-son shahar klinik shifoxonasiga yotqizilgan.
Mazkur holat bo‘yicha Yashnobod tuman IIO FMB huzuridagi tergov bo‘limi tomonidan B.I.ga nisbatan Jinoyat kodeksining 104-moddasi 2-qismi “l” bandi (qasddan badanga og‘ir shikast yetkazish) bilan jinoyat ishi qo‘zg‘atilgan va u gumon qilinuvchi tariqasida jinoyat ishiga ishtirok etishga jalb qilinib, protsessual tartibda ushlangan.
Tergov davomida jabrlanuvchi fuqaro B.I.ning sevgan qizi to‘g‘risida yomon gaplar aytgani, bundan uning jahli chiqib, mezbon bilan o‘zaro janjallashib ketgani va oqibatda pichoqlashuv sodir bo‘lgani aniqlangan. Hozirda tergov harakatlari davom etmoqda.
Ta’kidlanishicha, bu turdagi jinoyatlar uchun Jinoyat kodeksining normalariga ko‘ra, 5 yildan 8 yilgacha ozodlikdan mahrum qilish jazosi belgilangan.
Avvalroq Toshkentda 25 yoshli yigit mastlikda sherigiga 39 marta pichoq urib, o‘ldirgani, Toshkentda ayol rashk sabab erini pichoqlab qo‘ygani, Namanganda 35 yoshli mast erkak haqorat qilgani uchun sinfdoshini pichoqlagani to‘g‘risida xabar berilgandi.
Izoh (0)