O‘zbekiston Davlat soliq qo‘mitasi yanvar oyida amalga oshirilgan va Soliq ilovasida ro‘yxatdan o‘tkazilgan xaridlardan qaytadigan 1 foizlik keshbek 21−25-fevral kunlari to‘lab berilishini ma’lum qildi. Mos ravishda fevral xaridlari uchun keshbek mart oyining xuddi shu sanalarida to‘lanadi.
2021-yilning oktabr oyida prezidentning nazorat-kassa texnikasidan foydalanishni takomillashtirishga doir qarori qabul qilingandi. Hujjat bilan 2022-yil 1-yanvardan boshlab chakana savdo, umumiy ovqatlanish va aholiga maishiy xizmat ko‘rsatish obyektlarida xaridni amalga oshirgan hamda ushbu xaridni soliq organlarining maxsus mobil ilovasida xarid chekining QR-kod yordamida skanerlash orqali ro‘yxatdan o‘tkazgan jismoniy shaxslarga ularning bank kartalariga oy yakuni bilan xarid summasining 1 foizi respublika budjetidan qaytariladi.
“Sotib olingan tovarlar qaytarilganda tadbirkorlik subyektlarida xarid cheklariga tuzatish kiritish imkoniyati mavjudligini va ular tomonidan soliq hisobotlarini taqdim etish muddatlari hisobot oyidan keyingi oyning 20-sanasigacha etib belgilanganini inobatga olgan holda keshbek summasi 21-25-sanalarda qaytarilishini ma’lum qilamiz”, — deyiladi xabarda.
Avvalroq O‘zbekistonda texnik xizmat ko‘rsatish markazi xodimlari o‘zgalarning 11 milliard so‘mlik xarid chekidan tushgan keshbekni o‘zlashtirgani aniqlangani to‘g‘risida xabar berilgandi.
Izoh (0)