Тошкент шаҳрининг Яшнобод туманида 21 ёшли йигит маст ҳолда танишини пичоқлаб қўйди, деб хабар беради Тергов департаменти.
Маълум қилинишича, 10 февраль куни соат 00:30 ларда туманнинг Оҳанграбо кўчасида яшовчи 21 ёшли Б.И. таниши — 20 ёшли Б.Р.нинг уйига меҳмонга келган. Улар биргалашиб спиртли ичимликлар истеъмол қилиб, ўрталарида келиб чиққан жанжал оқибатида Б.И. мезбон танасининг турли жойларига пичоқ билан тан жароҳати етказган.
Олган тан жароҳатлари оқибатда Р.Б. 4-сон шаҳар клиник шифохонасига ётқизилган.
Мазкур ҳолат бўйича Яшнобод туман ИИО ФМБ ҳузуридаги тергов бўлими томонидан Б.И.га нисбатан Жиноят кодексининг 104-моддаси 2-қисми «л» банди (қасддан баданга оғир шикаст етказиш) билан жиноят иши қўзғатилган ва у гумон қилинувчи тариқасида жиноят ишига иштирок этишга жалб қилиниб, процессуал тартибда ушланган.
Тергов давомида жабрланувчи фуқаро Б.И.нинг севган қизи тўғрисида ёмон гаплар айтгани, бундан унинг жаҳли чиқиб, мезбон билан ўзаро жанжаллашиб кетгани ва оқибатда пичоқлашув содир бўлгани аниқланган. Ҳозирда тергов ҳаракатлари давом этмоқда.
Таъкидланишича, бу турдаги жиноятлар учун Жиноят кодексининг нормаларига кўра, 5 йилдан 8 йилгача озодликдан маҳрум қилиш жазоси белгиланган.
Аввалроқ Тошкентда 25 ёшли йигит мастликда шеригига 39 марта пичоқ уриб, ўлдиргани, Тошкентда аёл рашк сабаб эрини пичоқлаб қўйгани, Наманганда 35 ёшли маст эркак ҳақорат қилгани учун синфдошини пичоқлагани тўғрисида хабар берилганди.
Изоҳ (0)