“Toshkent shahar jamoat transporti tizimini yanada rivojlantirishga doir qo‘shimcha chora-tadbirlar to‘g‘risida”gi prezident qarori qabul qilindi.
Hujjatga ko‘ra, 2022-yilda 10 ta markaziy ko‘chalarda davlat-xususiy sheriklik asosida avtomobillarning avtomatlashtirilgan yo‘l bo‘yi pullik to‘xtash joylari tashkil etiladi. Xususan, Fidokor, Amir Temur, Nukus, Bratislava, Mirobod, Glinka, Avliyoota, Shevchenko, Said Baraka, Moshtabib va Yakub Kolas ko‘chalarida.
Vazirlar Mahkamasi ikki hafta muddatda avtomobillarning avtomatlashtirilgan yo‘l bo‘yi pullik to‘xtash joylarini tashkil etish va ulardan foydalanish tartibi to‘g‘risida qaror qabul qiladi.
Shuningdek, Toshkent shahrining magistral ko‘chalari, jumladan, Keles yo‘li, Ahmad Donish, Bog‘ishamol, Buyuk ipak yo‘li, Maxtumquli, Farg‘ona yo‘li, Lutfiy, Beshqayrag‘och, Ko‘kcha darvoza va Beruniy ko‘chalaridagi 11 ta avtobus yo‘nalishida alohida bo‘laklar tashkil etiladi. Bu ishlar 2026-yilga qadar amalga oshiriladi. Joriy yil oxirgi choragida faqat Ahmad Donish ko‘chasida alohida yo‘lak ishga tushiriladi.
Avvalroq O‘zbekistonda avtomototransport vositalarini ijaraga berishda notarial tasdiqlash tartibi bekor qilinayotgani, mamlakatda yuridik shaxslar ham avtomobillarni qisqa muddatga ijaraga olishi mumkin bo‘lgani to‘g‘risida xabar berilgandi.
Izoh (0)