Toshkent viloyatidagi avtomobillarga gaz to‘ldirish shoxobchasi tomonidan 35 ming ta xonadonning bir kunlik iste’moliga teng miqdordagi tabiiy gazdan noqonuniy foydalanish holati aniqlandi. Bu haqda Energetika vazirligi xabar qildi.
Qayd etilishicha, “O‘ztransgaz” mutaxassislari tomonidan 15-fevral kuni Toshkent viloyatining Yuqori Chirchiq tumanida joylashgan “Frozen gaz” MChJga qarashli avtomobillarga gaz to‘ldirish kompressor shoxobchasidagi gaz hisoblash tizimining texnik holati o‘rganilgan. Tadbir davomida korxona tomonidan dastlabki hisob-kitoblarga ko‘ra, 623 ming kub metr yoki bugungi kunda 35 mingta aholi xonadonlarining bir kunlik iste’moliga yetarli miqdordagi tabiiy gazdan noqonuniy foydalanish holati aniqlangan.
Tadbirkorlik subyekti tomonidan iste’mol qilingan tabiiy gaz haqiqiy qiymatini kamaytirish maqsadida elektron gaz hisoblash uskunasi tarkibiy qismlariga ta’sir o‘tkazilgan. Qayta hisob-kitob qilinishi natijasida 623 million so‘m zarar yetkazilgani aniqlangan.
“Holat yuzasidan qonun doirasida chora ko‘rilishini ta’minlash maqsadida tegishli hujjatlar huquqni muhofaza qilish organlariga yuborish uchun jamlanmoqda”, — deyiladi xabarda.
Mavzuga doir:
- Nukus davlat pedagogika institutiga qurish va ta’mirlash uchun ajratilgan qariyb 13 mlrd so‘m talon-toroj qilindi
- Buxoroda garovdagi qariyb 800 mln so‘mlik mulklarni sotib yuborgan korxona rahbari va sobiq bank xodimi ushlandi
- “Asakabank”ning 2 nafar xodimi qidiruvga berildi. Ular davlatga 504 ming dollar zarar yetkazgan
Izoh (0)