O‘zbekistonda dam olish kunlari bahoriy ob-havo bo‘lishi kutilmoqda

Respublika Gidrometeorologiya markazi 18—20-fevralga ob-havo prognozini e’lon qildi.

Unga ko‘ra, 18-fevral kunduz kuni O‘zbekiston hududi bo‘yicha bir kun oldin boshlangan havoning isishi davom etadi. Respublikaning barcha hududlarida quruq va kam bulutli ob-havo kutilmoqda, kunduzi havo 10-13 daraja iliqqacha isiydi. Respublikaning tog‘li hududlarida qor ko‘chishi xavfi saqlanib turadi.

Dam olish kunlari respublika hududining katta qismida quruq ob-havo saqlanib turadi, faqat 19-fevralda Surxondaryo viloyatida, 20-fevralda Samarqand, Jizzax, Surxondaryo viloyatlarida ba’zi joylarda biroz yomg‘ir yog‘ishi mumkin. Tog‘oldi va tog‘li hududlarda yomg‘ir va ho‘l qor ko‘rinishidagi yog‘ingarchilik bo‘ladi.

Tungi sovuqlar asta-sekin chekinadi, kunduz kunlari esa ko‘proq bahor fasli uchun xos bo‘lgan qiymatlargacha isiydi. 20-fevralga kelib, harorat kechasi 2-7 daraja iliqqacha, kunduz kuni esa termometr ustuni 15-17 daraja iliq, janubda 18-20 daraja iliqqacha yetadi.