Buxoroda viloyat hokimi rahbarlik qilayotgan birinchi sektor hududida jinoyatlar soni keskin oshgani ma’lum qilindi

Buxoro viloyatida viloyat rahbari boshchilik qilayotgan birinchi sektor hududida jinoyatlar soni keskin oshgan. Bu haqda viloyat IIB boshlig‘i Shuhrat Aliyev ishtirokidagi matbuot anjumanida ma’lum qilindi, deya xabar berdi “Daryo” muxbiri.

Qayd etilishicha, viloyat IIB rahbari ishtirokidagi matbuot anjumanida viloyatdagi to‘rtta sektor hududida jinoyatlar soni 2021-yilda avvalgi yillarga nisbatan keskin oshgani aytib o‘tilgan.

“Viloyat hokimiga tegishli sektor hududida barcha sohalar bo‘yicha jinoyatlar soni 485 taga ortib, 1303 tani tashkil qilgan. Sodir etilgan jinoyatlarning 738 tasi yoki 56 foizi birinchi sektordagi to‘rtta hudud hissasiga to‘g‘ri kelmoqda. Viloyat prokurori sektorida jinoyatlar soni 434 taga ortgan bo‘lib, umumiy ko‘rsatkich 1244 tani ko‘rsatgan. Viloyat Ichki ishlar boshqarmasi boshlig‘i, o‘zimga taalluqli uchinchi sektor hududida esa yil davomida 1194 ta jinoyat sodir etilgan. Bu avvalgi yillarga nisbatan jinoyatlar 324 taga ko‘p, degani. Viloyat soliq boshqarmasi boshlig‘i sektori hududida esa barcha sohalar bo‘yicha jinoyatlar soni 454 taga ko‘payib, 1056 ta jinoyat sodir etilgan”, — deydi viloyat IIB boshlig‘i Shuhrat Aliyev.

Viloyat IIB axborot xizmati rahbari Shuhrat Jalolov hududlarda sodir etilayotgan jinoyatlar birgina ichki ishlar organlari tomonidan emas, barcha huquq-tartibot idoralari vakillari hamkorligida aniqlanayotganini aytmoqda.

“Hududlarda sodir etilayotgan jinoyatlar birgina ichki ishlar organlari tomonidan emas, barcha huquq-tartibot idoralari vakillari hamkorligida aniqlanmoqda. Shu nuqtayi nazardan, jinoyatlar soni o‘tgan yillardagiga nisbatan oshib ketgan. Bu orqali faqatgina jinoyatning oqibatlaridan xabardor bo‘linmayapti, balki ularning barvaqt oldini olish uchun tizim shakllantirilyapti”, — deydi viloyat IIB matbuot xizmati rahbari.

Boshqarma boshlig‘i Shuhrat Aliyev jinoyatlar ko‘proq qanday shaxslar tomonidan sodir etilayotganini ham aytdi.

“Aniqlangan jinoyatlar soni har sohada oshgan. Ta’lim, sog‘liqni saqlash, bank sohasi, yo‘l harakati qoidalarini qo‘pol ravishda buzish, giyohvandlik vositalarini saqlash yoki o‘tkazish, axborot xavfsizligi sohasi va hokazo. Lekin ular ko‘proq qanday shaxslar tomonidan sodir etilmoqda? Birgina voyaga yetmaganlar tomonidan sodir etilgan jinoyatlar 60 taga oshgan. Yoshlar tomonidan sodir etilgan jinoyatlar esa 447 taga, ayollar o‘rtasida 188 taga ko‘paygan”, — dedi Shuhrat Aliyev.

2019-yilda Buxoro viloyat IIB boshlig‘i Shuhrat Aliyev Buxoro yoshlar markazida o‘tkazilgan “Rahbar va yoshlar” uchrashuvida “Buxoro yoshlari Respublikada birorta ham jinoyat sodir etmaydi, deb ishonaman”, degandi.