Ўзбекистонда дам олиш кунлари баҳорий об-ҳаво бўлиши кутилмоқда

Республика Гидрометеорология маркази 18—20 февралга об-ҳаво прогнозини эълон қилди.

Унга кўра, 18 февраль кундуз куни Ўзбекистон ҳудуди бўйича бир кун олдин бошланган ҳавонинг исиши давом этади. Республиканинг барча ҳудудларида қуруқ ва кам булутли об-ҳаво кутилмоқда, кундузи ҳаво 10-13 даража илиққача исийди. Республиканинг тоғли ҳудудларида қор кўчиши хавфи сақланиб туради.

Дам олиш кунлари республика ҳудудининг катта қисмида қуруқ об-ҳаво сақланиб туради, фақат 19 февралда Сурхондарё вилоятида, 20 февралда Самарқанд, Жиззах, Сурхондарё вилоятларида баъзи жойларда бироз ёмғир ёғиши мумкин. Тоғолди ва тоғли ҳудудларда ёмғир ва ҳўл қор кўринишидаги ёғингарчилик бўлади.

Тунги совуқлар аста-секин чекинади, кундуз кунлари эса кўпроқ баҳор фасли учун хос бўлган қийматларгача исийди. 20 февралга келиб, ҳарорат кечаси 2-7 даража илиққача, кундуз куни эса термометр устуни 15-17 даража илиқ, жанубда 18-20 даража илиққача етади.