Senatning yigirma uchinchi yalpi majlisida “Moddiy-madaniy meros obyektlarini muhofaza qilish kuchaytirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun muhokama qilindi. Bu haqda Oliy Majlis Senati xabar qildi.
Qayd etilishicha, turizm yo‘nalishini milliy iqtisodiyotning drayver sohalaridan biriga aylantirish maqsad qilib olingan. Moddiy-madaniy meros obyektlari muhofazasini kuchaytirish dolzarb masalalardan biri hisoblanadi.
Muhokama davomida Senat tomonidan Buxoro, Qashqadaryo viloyatlari hamda Toshkent shahrida olib borilgan o‘rganishlar mobaynida moddiy madaniy meros obyektlariga juda katta miqdorda zarar yetkazish holatlari aniqlangani, davlat muhofazasiga olingan ayrim arxeologik obyektlar yo‘q bo‘lib ketgani ta’kidlangan.
“Ayrim hollarda Davlat budjeti mablag‘lari hisobiga madaniy meros obyektlarida amalga oshirilayotgan ishlar restavratsiya qilish talablariga zid ravishda olib borilib, ularning tarixiy va badiiy qimmatiga ko‘p miqdorda zarar yetkazilmoqda”, — deyiladi xabarda.
Jumladan, Sitorai Mohi Xossa tarixiy majmuasida olib borilgan restavratsiya ishlari ahvoli o‘rganilganida majmuada restavratsiya ishlari noto‘g‘ri olib borilgani aniqlangan. Oqibatda uning badiiy bezaklari, naqshlari, koshinlari nobud qilinib, tarixiy va badiiy qiymatiga jami 28 milliard so‘mlik zarar yetkazilgan.
Mavjud muammolarning qonuniy yechimini belgilash maqsadida “Moddiy-madaniy meros obyektlarini muhofaza qilish kuchaytirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun ishlab chiqilgan.
Qonunda moddiy madaniy meros obyektlarini nobud qilish, buzish yoki ularga shikast yetkazganlik uchun javobgarlikni kuchaytirish, bunday toifadagi obyektlarga juda ko‘p miqdorda zarar yetkazganlikni ifodalovchi qilmishlarni og‘ir jinoyatlar toifasiga o‘tkazish, Turizm va sport vazirligi huzuridagi Madaniy meros agentligining ijro etilishi majburiy bo‘lgan ko‘rsatma va taqdimnomalarini belgilangan muddatda va to‘liq bajarilmagani yuzasidan javobgarlikni belgilash nazarda tutilgan.
Qonun senatorlar tomonidan ma’qullangan.
Mavzuga doir:
- Parkentda arxeologik yodgorlik hududi g‘isht ishlab chiqarish uchun sotib yuborilgani aniqlandi
- Buxoroda qo‘yxonaga aylangani rad etilgan “Chor minor” madrasasi chorbog‘ida tandirdan ham foydalanib kelingani ma’lum bo‘ldi
- “Arxeologik yodgorliklarni muhofaza qilmaslik — jinoyat”. Arxeolog Shoshtepani konservatsiya qilish ishlari kechikayotganini ma’lum qildi
Izoh (0)