Хитойда 2021 йилда автомобиль экспорти ундан олдинги йилга нисбатан икки баробарга ошиб, тарихда илк бор 2,02 миллион донага етди. Бу ҳақда Хитой автомобиль саноати ассоциацияси томонидан эълон қилинган ҳисоботга таяниб, «ТАСС» хабар берди.
Хусусан, хорижга янги энергия манбалари билан таъминланган автомашиналарни етказиб бериш уч баробар ортиб, 310 минг автомобилни ташкил этган. Енгил автомобилларининг экспорти 1,61 миллион донага, тижорий автомобиллари экспорти эса 402 мингтага етган.
Автомобиль ишлаб чиқарувчилар декабрь ойининг ўзида 223 минг дона автомобиль экспорт қилган (ўсиш 54 фоиз).
Хитойдаги China International Capital Corporation (CICC) етакчи инвестиция банк гуруҳи мамлакатдаги автомобиллар савдоси 2022 йилда 6,2 фоизга ўсишини тахмин қилмоқда. «Хитой автомобиль саноати маҳсулотларига истеъмол талаби 2022 йилда ҳам барқарор ўсишни сақлаб қолиши кутилмоқда», — дейилади корпорация ҳисоботида.
Пронозларга кўра, 2022 йилда мамлакатдаги автомобиль савдоси 27,22 миллион донага етади. Шу билан бирга, енгил автомобиллар савдоси 22,76 миллионга етиши кутиляпти — ўсиш 8,1 фоиз. Юк машиналари ва бошқа тижорий автомобиллар 2,2 фоизга кўпроқ ишлаб чиқарилади — 4,46 миллион дона.
CICC прогнозларида қайд этилишича, тобора оммалашиб бораётган икки ғилдиракли электромобиллар савдоси 2022 йилда 54 миллион донага етишини кутмоқда — бу 2021 йилга нисбатан 14,9 фоизга кўп демак.
Аввалроқ Япониянинг энг йирик автомобиль ишлаб чиқарувчиси Toyota дунё бўйлаб барча заводларини ёпмоқчилигини эълон қилганди. Ишлаб чиқаришнинг тўхтатилишга яримўтказгичлар етишмаслиги сабаб бўлмоқда.
Изоҳ (0)