Vazirlar Mahkamasi 19-yanvar kuni “Xorijiy tillarni o‘rganishni takomillashtirish bo‘yicha qo‘shimcha chora-tadbirlar to‘g‘risida”gi qarorni qabul qildi. Bu haqda “Rasmiy xabarlar” ma’lum qildi.
Qarorga muvofiq, Qoraqalpog‘iston, 12 ta viloyat va Toshkent shahar hokimliklari tomonidan har yili tuman (shahar)dagi maktablarni xorijiy tillarni o‘qitish uchun zarur bo‘lgan adabiyotlar, asbob-uskunalar, zamonaviy axborot texnologiyalari bilan ta’minlash uchun mahalliy budjetlardan 1 milliard so‘mdan kam bo‘lmagan miqdorda mablag‘ ajratiladi. Pul agentlik bilan kelishilgan manzilli dasturlar asosida sarflanadi.
Bunda hududlardagi hokimlar ushbu mablag‘larni:
2021-yil yakunlari bo‘yicha Qoraqalpog‘iston Respublikasi respublika budjeti, Toshkent shahar va viloyatlar mahalliy budjetlarida shakllangan erkin qoldiq mablag‘lari hisobidan joriy yilning 15-fevraliga qadar;
2022-yil uchun joriy yil mahalliy budjet parametrlari hamda yil davomida shakllanadigan qo‘shimcha manbalar hisobidan joriy yilning 15-iyuliga qadar ajratish choralari ko‘riladi.
Xalq ta’limi vazirligi 2022/2023-o‘quv yilidan boshlab umumiy o‘rta ta’lim tashkilotlari uchun zamonaviy til o‘rgatish metodikalari asosida ishlab chiqilgan chet tili darsliklarini to‘liq chop etadi va ta’lim tashkilotlariga yetkazadi. Yangi darsliklardan foydalanish metodikalari bo‘yicha o‘qituvchilar va metodistlar uchun malaka oshirish kurslari tashkil etiladi. Chet tili fanidan kasbiy (ijodiy) kirish imtihonlari Davlat test markazi tomonidan amalga oshiriladi.
Oliy va o‘rta maxsus ta’lim vazirligi, Davlat test markazi bilan birgalikda ikki oy muddatda 2024/2025-o‘quv yilidan boshlab bosqichma-bosqich oliy ta’lim muassasalariga kirish imtihonlari uchun belgilangan majburiy fanlar majmuasiga chet tili fanini kiritish yuzasidan asoslangan taklif kiritadi.
1-sentabrdan boshlab maktabgacha, umumiy o‘rta, o‘rta maxsus va professional, shuningdek, maktabdan tashqari ta’lim tashkilotlari chet tili fani o‘qituvchilarining attestatsiyasi jarayonida o‘quv fani bo‘yicha malaka sinovlari Ta’lim sifatini nazorat qilish davlat inspeksiyasi tomonidan tinglab tushunish, o‘qish, yozish hamda gapirish til ko‘nikmalarini baholashni nazarda tutuvchi kasbiy sinov shaklida amalga oshiriladi. Bunda S1 darajadagi milliy yoki unga tenglashtirilgan mos darajadagi xalqaro tan olingan sertifikatga ega chet tili fani o‘qituvchilariga o‘quv fani bo‘yicha malaka sinovidan maksimal ball berish tartibi saqlab qolinadi.
2022-yil 1-fevraldan 2024-yil 1-yanvarga qadar Toshkent va Samarqand shaharlarida faoliyat yuritadigan nodavlat ta’lim tashkilotlari ta’lim jarayonida foydalaniladigan bino va inshootlar ijara to‘lovi xarajatlarining 50 foizigacha, biroq davlat ko‘chmas mulk obyektlaridan foydalanganlik uchun ijara to‘lovining qonunchilik hujjatlarida belgilangan minimal stavkasining 50 foizi miqdoridan ko‘p bo‘lmagan miqdorda Davlat budjeti mablag‘lari hisobidan qoplab berish tartibi joriy etiladi.
Vazirlik va idoralar tizimidagi kollej va texnikumlarning bino va inshootlarida faoliyatini amalga oshirganida ijara to‘lovidan ozod etish (saqlash va kommunal to‘lovlar bo‘yicha xarajatlar bundan mustasno) to‘g‘risidagi taklifiga rozilik berilgan.
Umumiy shtat birliklari doirasida 3 ta shtat birligidan iborat Xorijiy tillarni bilish darajasi to‘g‘risidagi sertifikatlar yagona bazasini yuritish bo‘limi tashkil etiladi.
Izoh (0)