Вазирлар Маҳкамаси 19 январь куни «Хорижий тилларни ўрганишни такомиллаштириш бўйича қўшимча чора-тадбирлар тўғрисида»ги қарорни қабул қилди. Бу ҳақда «Расмий хабарлар» маълум қилди.
Қарорга мувофиқ, Қорақалпоғистон, 12 та вилоят ва Тошкент шаҳар ҳокимликлари томонидан ҳар йили туман (шаҳар)даги мактабларни хорижий тилларни ўқитиш учун зарур бўлган адабиётлар, асбоб-ускуналар, замонавий ахборот технологиялари билан таъминлаш учун маҳаллий бюджетлардан 1 миллиард сўмдан кам бўлмаган миқдорда маблағ ажратилади. Пул агентлик билан келишилган манзилли дастурлар асосида сарфланади.
Бунда ҳудудлардаги ҳокимлар ушбу маблағларни:
2021 йил якунлари бўйича Қорақалпоғистон Республикаси республика бюджети, Тошкент шаҳар ва вилоятлар маҳаллий бюджетларида шаклланган эркин қолдиқ маблағлари ҳисобидан жорий йилнинг 15 февралига қадар;
2022 йил учун жорий йил маҳаллий бюджет параметрлари ҳамда йил давомида шаклланадиган қўшимча манбалар ҳисобидан жорий йилнинг 15 июлига қадар ажратиш чоралари кўрилади.
Халқ таълими вазирлиги 2022/2023-ўқув йилидан бошлаб умумий ўрта таълим ташкилотлари учун замонавий тил ўргатиш методикалари асосида ишлаб чиқилган чет тили дарсликларини тўлиқ чоп этади ва таълим ташкилотларига етказади. Янги дарсликлардан фойдаланиш методикалари бўйича ўқитувчилар ва методистлар учун малака ошириш курслари ташкил этилади. Чет тили фанидан касбий (ижодий) кириш имтиҳонлари Давлат тест маркази томонидан амалга оширилади.
Олий ва ўрта махсус таълим вазирлиги, Давлат тест маркази билан биргаликда икки ой муддатда 2024/2025-ўқув йилидан бошлаб босқичма-босқич олий таълим муассасаларига кириш имтиҳонлари учун белгиланган мажбурий фанлар мажмуасига чет тили фанини киритиш юзасидан асосланган таклиф киритади.
1 сентябрдан бошлаб мактабгача, умумий ўрта, ўрта махсус ва профессионал, шунингдек, мактабдан ташқари таълим ташкилотлари чет тили фани ўқитувчиларининг аттестацияси жараёнида ўқув фани бўйича малака синовлари Таълим сифатини назорат қилиш давлат инспекцияси томонидан тинглаб тушуниш, ўқиш, ёзиш ҳамда гапириш тил кўникмаларини баҳолашни назарда тутувчи касбий синов шаклида амалга оширилади. Бунда С1 даражадаги миллий ёки унга тенглаштирилган мос даражадаги халқаро тан олинган сертификатга эга чет тили фани ўқитувчиларига ўқув фани бўйича малака синовидан максимал балл бериш тартиби сақлаб қолинади.
2022 йил 1 февралдан 2024 йил 1 январга қадар Тошкент ва Самарқанд шаҳарларида фаолият юритадиган нодавлат таълим ташкилотлари таълим жараёнида фойдаланиладиган бино ва иншоотлар ижара тўлови харажатларининг 50 фоизигача, бироқ давлат кўчмас мулк объектларидан фойдаланганлик учун ижара тўловининг қонунчилик ҳужжатларида белгиланган минимал ставкасининг 50 фоизи миқдоридан кўп бўлмаган миқдорда Давлат бюджети маблағлари ҳисобидан қоплаб бериш тартиби жорий этилади.
Вазирлик ва идоралар тизимидаги коллеж ва техникумларнинг бино ва иншоотларида фаолиятини амалга оширганида ижара тўловидан озод этиш (сақлаш ва коммунал тўловлар бўйича харажатлар бундан мустасно) тўғрисидаги таклифига розилик берилган.
Умумий штат бирликлари доирасида 3 та штат бирлигидан иборат Хорижий тилларни билиш даражаси тўғрисидаги сертификатлар ягона базасини юритиш бўлими ташкил этилади.
Изоҳ (0)