Фарғона шаҳрида 6 килограмм 90 граммли чақалоқ туғилди. Бу ҳақда «Дарё»га вилоят соғлиқни сақлаш бошқармаси ахборот хизмати раҳбари Иқболжон Абдужабборов маълум қилди.
Қайд этилишича, 18 январь куни фарғоналик Мавлудахон Хўжаева Фарғона шаҳар тиббиёт бирлашмаси туғуруқ бўлимида вазни 6 килограмм 90 грамм, бўйи 60 сантиметр бўлган ўғил чақалоқни дунёга келтирган.
Фарғона шаҳар тиббиёт бирлашмаси туғуруқ бўлими бош шифокори Шоира Исмоилованинг маълум қилишича, чақалоқ 39-ҳафтада жарроҳлик амалиёти ёрдамида туғилган. Ҳозирда она ва боланинг аҳволи яхши, улар шифокорларнинг доимий назоратида.
Таъкидланишича, ушбу чақалоқ мазкур туғуруқ бўлимида шу вақтга қадар туғилган энг вазни оғир бола ҳисобланади. Бу ерда йирик вазнли чақалоқлар туғилиши ҳолати илгари ҳам кузатилган. Шифокорларнинг қайд этишича, бу ерда 5 килограмм вазнли чақалоқ ҳам дунёга келган.
Маълумот учун, 33 ёшли Мавлуда Хўжаеванинг 3 нафар қизи бор, янги чақалоқ эса унинг тўртинчи фарзанди ҳисобланади.
Эслатиб ўтамиз, Ўзбекистонда 2021 йилнинг январь—ноябрь ойларида 16 минг 822 нафар эгизак чақалоқ туғилган. 2021 йил 1 декабрь ҳолатига кўра, Ўзбекистонда 832,4 минг туғилиш қайд этилган. Ноябрь ойининг ўзида эса республикада жами 79 213 та чақалоқ туғилган. Давлат статистика қўмитаси маълумотларига кўра, Ўзбекистонда 10 йил давомида уч нафар эгизаклар туғилиши 4 бараварга кўпайди. 2021 йилнинг биринчи ярмида эгизаклар сони бўйича Самарқанд вилояти етакчи бўлган.
Изоҳ (0)