Uzbekistan Airways Janubiy Koreyaga kirishda yangi qoidalar o‘rnatilganini ma’lum qildi

Koronavirus bilan bog‘liq vaziyat keskinlashgani sabab Janubiy Koreya hukumati mamlakatga kirish istagida bo‘lgan yo‘lovchilar uchun yangi qoidalarni joriy qildi. Bu haqda Uzbekistan Airways xabar qildi.

Yangi talablarga ko‘ra, 20-yanvardan boshlab Koreya Respublikasiga borayotgan yo‘lovchilar (6 yoshdan boshlab) parvozdan kamida 48 soat oldin COVID-19 ga qarshi PZR usulda topshirilgan testning salbiy natijasini taqim etishi kerak. Test natijalari ingliz va koreys tillariga tarjima qilinishi lozim.

Avvalroq Tashqi mehnat migratsiyasi agentligi Janubiy Koreya mamlakatga tashrif buyuradigan O‘zbekiston fuqarolari sonini qisqartirishi yoki kirishni vaqtinchalik cheklashi mumkinligini xabar qilgandi. Bunga 2021-yil 23—30-dekabr kunlari jo‘nab ketgan fuqarolarning 1 nafarida, 2022-yilning 6-yanvar kuni jo‘nab ketgan 98 nafar fuqaroning 6 nafarida koronavirus infeksiyasi aniqlangani sabab bo‘lgan.

Eslatib o‘tamiz, Uzbekistan Airways AQShga kirishda qo‘shimcha talablar qo‘yilgani sabab fuqarolarni ogohlantirgandi. Unga ko‘ra, yo‘lovchilardan parvozdan kamida 24 soat oldin topshirilgan manfiy javobli PZR testi talab qilinadi. Shuningdek, yo‘lovchilar maxsus attestatsiya varaqasini to‘ldirishi va ro‘yxatdan o‘tish paytida uni bosma shaklda taqdim etishi shart.