O‘zbekistonda davlat hokimiyati va boshqaruvi organlari faoliyatining ochiqligi to‘g‘risidagi qonunchilikni buzganlik uchun javobgarlik belgilanmoqda. Mazkur mazmundagi qonun loyihasi Oliy Majlis Qonunchilik palatasida ko‘rib chiqilyapti, deb xabar beradi deputat Rasul Kusherbayev.
Ta’kidlanishicha, Ma’muriy javobgarlik to‘g‘risidagi kodeksda davlat hokimiyati va boshqaruvi organlari faoliyatining ochiqligi to‘g‘risidagi qonun hujjatlarini buzganlik uchun javobgarlik belgilanmagan.
Yangi taklif etilayotgan loyihaga ko‘ra, davlat hokimiyati va boshqaruvi organlari faoliyatining ochiqligi to‘g‘risidagi qonunchilikni buzish, jumladan, ochiq ma’lumotlar sifatida joylashtirilishi kerak bo‘lgan ijtimoiy ahamiyatga molik ma’lumotlar ro‘yxatiga kiritilgan ma’lumotlarni e’lon qilmaslik yoki to‘liq e’lon qilmaslik, e’lon qilish muddati va tartibini buzish yoki ma’lumotlarni noto‘g‘ri ko‘rsatishga nisbatan javobgarlik belgilanmoqda.
Bunda, mansabdor shaxslarga bazaviy hisoblash miqdorining uch baravaridan besh baravarigacha (1,35 million so‘m) miqdorda, agar shunday huquqbuzarlik ma’muriy jazo chorasi qo‘llanilganidan keyin bir yil davomida takror sodir etilgan bo‘lsa, mansabdor shaxslarga bazaviy hisoblash miqdorining besh baravaridan o‘n baravarigacha (2,7 million so‘mgacha)miqdorda jarima solishga sabab bo‘lishi nazarda tutilmoqda.
Bunday huquqbuzarliklar bo‘yicha Korrupsiyaga qarshi kurashish agentligining mansabdor shaxslari ma’muriy huquqbuzarlik to‘g‘risida bayonnoma tuzib, sudga yuboradi.
“Jamoatchilikning ko‘plab muhokamalariga sabab bo‘lib kelayotgan, kutilgan qonunning parlamentda ko‘rib chiqilayotgani quvonarli hol, albatta. Endi davlat idoralari mas’ullari ochiqlik masalasiga yanada mas’uliyat bilan yondashishadi”, — deb yozadi Kusherbayev.
Avvalroq Facebook’dagi “Samarqandni qutqaraylik” guruhi faoli tasdiqlanmagan xabarni tarqatgani uchun hibsga olingani, Davlat statistika qo‘mitasi ustidan IIBga ariza bergan “Orginfo.uz” sayti asoschisiga oid ish yopilgani to‘g‘risida xabar berilgandi.
Izoh (0)