Toshkent shahar tez yordam xizmatiga 12-yanvarda 4888 ta murojaat kelib tushdi. Bu haqda Sog‘liqni saqlash vazirligi matbuot xizmati xabar berdi.
Mavjud vaziyatni yaqindan o‘rganish maqsadida sog‘liqni saqlash vaziri Behzod Musayev 14-yanvar kuni tungi soat 03:00 larda Toshkent shahar tez yordam stansiyasida bo‘lib, u yerdagi Call-markaz hamda tez tibbiy yordam xodimlari ish jarayoni bilan tanishgan.
“103” xizmatiga chaqiriqlar soni ortgani va ish yuklamasi ko‘payib borayotgani sababli shu soatning o‘zidayoq vazir topshirig‘i bilan qo‘shimcha tarzda 40 ta zamonaviy jihozlangan tez tibbiy yordam mashinasi haydovchilari bilan birga xizmat tasarrufiga biriktirib berilgan.
Shuningdek, brigadalar uchun 14-yanvardan zarur miqdorda koronavirusga qarshi dori-darmonlar bo‘lgan “Covid-box”lar ajratiladigan bo‘ldi.
“Tez tibbiy yordam xodimlari bilan yarim tunda o‘tgan muloqot chog‘ida koronavirus infeksiyasi aniqlangan, biroq xastalik klinik belgilarsiz yoki yengil shaklda kechayotgan bemorlar salomatligini nazorat qilish, ularga ambulator va uyiga borgan holda sifatli tibbiy xizmat ko‘rsatish maqsadida Toshkent shahrining 12 ta tumanida 1 tadan maxsus COVID poliklinikalar faoliyati yo‘lga qo‘yildi”, — deyiladi xabarda.
Bundan tashqari, koronavirus kasalligi bo‘yicha murojaatlar bilan samarali ishlash maqsadida poytaxtdagi 12 ta ko‘p tarmoqli va 66 ta oilaviy poliklinikalarda maxsus mobil brigadalar faoliyati ham yo‘lga qo‘yilgan.
Avvalroq Behzod Musayev tunda Toshkent shifoxonalaridagi vaziyatni o‘rgangani, Behzod Musayev SSV tizimidagi talabga javob bermaydigan barcha sanitariya-gigiyena xonalarini ta’mirdan chiqarish bo‘yicha ko‘rsatma bergani to‘g‘risida xabar berilgandi.
Izoh (0)