Ўзбекистонда давлат ҳокимияти ва бошқаруви органлари фаолиятининг очиқлиги тўғрисидаги қонунчиликни бузганлик учун жавобгарлик белгиланмоқда. Мазкур мазмундаги қонун лойиҳаси Олий Мажлис Қонунчилик палатасида кўриб чиқиляпти, деб хабар беради депутат Расул Кушербаев.
Таъкидланишича, Маъмурий жавобгарлик тўғрисидаги кодексда давлат ҳокимияти ва бошқаруви органлари фаолиятининг очиқлиги тўғрисидаги қонун ҳужжатларини бузганлик учун жавобгарлик белгиланмаган.
Янги таклиф этилаётган лойиҳага кўра, давлат ҳокимияти ва бошқаруви органлари фаолиятининг очиқлиги тўғрисидаги қонунчиликни бузиш, жумладан, очиқ маълумотлар сифатида жойлаштирилиши керак бўлган ижтимоий аҳамиятга молик маълумотлар рўйхатига киритилган маълумотларни эълон қилмаслик ёки тўлиқ эълон қилмаслик, эълон қилиш муддати ва тартибини бузиш ёки маълумотларни нотўғри кўрсатишга нисбатан жавобгарлик белгиланмоқда.
Бунда, мансабдор шахсларга базавий ҳисоблаш миқдорининг уч бараваридан беш бараваригача (1,35 миллион сўм) миқдорда, агар шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, мансабдор шахсларга базавий ҳисоблаш миқдорининг беш бараваридан ўн бараваригача (2,7 миллион сўмгача)миқдорда жарима солишга сабаб бўлиши назарда тутилмоқда.
Бундай ҳуқуқбузарликлар бўйича Коррупцияга қарши курашиш агентлигининг мансабдор шахслари маъмурий ҳуқуқбузарлик тўғрисида баённома тузиб, судга юборади.
«Жамоатчиликнинг кўплаб муҳокамаларига сабаб бўлиб келаётган, кутилган қонуннинг парламентда кўриб чиқилаётгани қувонарли ҳол, албатта. Энди давлат идоралари масъуллари очиқлик масаласига янада масъулият билан ёндашишади», — деб ёзади Кушербаев.
Аввалроқ Facebook’даги «Самарқандни қутқарайлик» гуруҳи фаоли тасдиқланмаган хабарни тарқатгани учун ҳибсга олингани, Давлат статистика қўмитаси устидан ИИБга ариза берган «Orginfo.uz» сайти асосчисига оид иш ёпилгани тўғрисида хабар берилганди.
Изоҳ (0)