O‘zbekistonda yanvar oyining dastlabki 10 kunida tez yordam xizmatiga 349 ming 436 ta chaqiriq kelib tushgan. Bu haqda Sog‘liqni saqlash vazirligi xabar qilmoqda.
Qayd etilishicha, shu davr mobaynida tana haroratining ko‘tarilishi bo‘yicha 32 ming 400 ta, koronavirusga gumon qilingan, kasallikka chalingan va boshqa yuqumli kasalliklar bilan 1338 ta murojaat qayd etilgan. So‘nggi kunlarda koronavirus bilan kasallanish holati keskin ortgani sabab tez yordam xizmatiga bo‘lgan talab va chaqiriqlar soni ham ko‘paygan.
Taqqoslash uchun, 2021-yil dekabr oyi dastlabki o‘n kunligida tez yordamga murojaatlar soni 320 ming 980 tani tashkil qilgan edi.
Shuningdek, yanvar oyining ilk kunlari 103 xizmatiga bir kunda o‘rtacha 34 ming 600 ta chaqiriq qabul qilingan bo‘lsa, 9—10-yanvar kunlari murojaatlar soni biroz ortib, qariyb 37 mingtaga yetgan.
Xususan, 1—10-yanvar kunlari Toshkent shahar tez yordam xizmatiga jami 36 ming 925 ta chaqiriq kelib tushgan. Shundan tana haroratining ko‘tarilishi bo‘yicha 8636 ta, koronavirusga gumon qilingan, kasallikka chalingan va boshqa yuqumli kasalliklar bilan 663 nafar bemor murojaat qilgan. Jami 5751 nafar bemor gospitalizatsiya qilingan.Eslatib o‘tamiz, O‘zbekistonda koronavirusning omikron shtammi aniqlangani munosabati bilan 15-yanvardan boshlab mamlakatda bir qator cheklovlar joriy etiladi. Jumladan, turli tadbirlar tashkil etish taqiqlanadi, emlanmagan xodimlar ishga qo‘yilmaydi. Oliy ta’lim muassasalari talabalari o‘rtasida ta’til davomida koronavirus infeksiyasiga qarshi to‘liq emlash choralari ko‘riladi.
Mavzuga doir:
Izoh (0)