Toshkent kimyo-texnologiya instituti 2022/2023-o‘quv yilidan boshlab tabaqalashtirilgan to‘lov-kontraktlaridan voz kechishi mumkin. Bu haqda “Rasmiy xabarlar” ma’lum qildi.
Qayd etilishicha, Toshkent kimyo texnologiya instituti rektori Botir Usmonov AOKAda o‘tkazilgan matbuot anjumanida institutga moliyaviy mustaqillik berilganini bildirib, bu yil ikkinchi semestr uchun narxlar o‘zgarmasligini ma’lum qilgan.
Shuningdek, u kelasi o‘quv yilidan boshlab super-kontraktga talaba qabul qilishdan voz kechishga harakat qilinishini aytib, sababini quyidagicha izohlagan:
“Chunki biz ta’lim sifatiga asoslangan brend yaratishni maqsad qilganmiz. Shu bois faqat iqtidorli va ishlab chiqaruvchilarga ma’qul keladigan nomzodlarni talabalikka qabul qilamiz”.
Ma’lumot uchun, tabaqalashtirilgan to‘lov-kontraktni to‘plagan ballari tasdiqlangan to‘lov-kontrakt doirasidagi qabul parametrlari chegarasiga 4,05 balldan ortiq yetmagan, 56,7 balldan kam bo‘lmagan holda, qo‘shimcha ravishda o‘qish istagini bildirgan abituriyentlarning birinchi o‘quv yili uchun to‘laydi. Talabalar birinchi o‘quv yilini tugatgandan so‘ng keyingi o‘quv yilidan boshlab amalda o‘rnatilgan bazaviy to‘lov-kontrakt miqdori asosida o‘qishini davom ettiradi.
Avvalroq O‘zbekistonda abituriyentlarga tabaqalashtirilgan to‘lov-shartnomalarini onlayn rasmiylashtirish imkoniyati yaratilgani, 2021/2022-o‘quv yili uchun super-kontrakt miqdorlari tasdiqlangani xabar qilingandi.
Izoh (0)