Jeyms Kemeronning filmida Rouzning keksayganini gavdalantirgan Gloriya Styuart “Oskar”ga va “Oltin globus” mukofotiga Eng yaxshi ikkinchi darajali aktrisa sifatida nomzodi qo‘yilgan. Har ikki mukofot ham “Los-Ajeles sirlari” filmidagi roli uchun Kim Beysingerga nasib qilgan, ammo Styuart shunda ham faoliyati e’tirof etilganidan mamnun bo‘lib qolgan.
“Titanik”da 85 yoshida suratga tushgan aktrisa karyerasining boshida qanday ko‘rinishga ega bo‘lgani haqida ma’lumot berib o‘tamiz. Gloriya Styuart 1910-yil 4-iyul kuni Santa-Monikada dunyoga kelgan. Uning karyerasi orada uzilishlar bilan 70 yil davom etgan. Bu muddat davomida u teatr, kino va televideniye yulduzi bo‘lishga ulgurgan.
Gloriyaning kinosanoatdagi debyuti 22 yilda bo‘lgan. Uning ilk katta loyihasi Universal Studios kompaniyasi bilan hamkorlik bo‘lgan. Styuart o‘z ishini shunchalik qoyillatganidan WAMPAS Baby Stars reklama kampaniyasining ro‘yxatidagi 13 qizdan biri bo‘lgan.
Gloriya Styuartning karyerasi asta-sekinlik bilan rivojlangan. U “Eski, qari uy”, “Ko‘rinmas odam”, “Ko‘zgu oldidagi bo‘sa” filmlarida ishtirok etib rejissor Jeyms Veylni o‘ziga maftun qilgan. Universal Studios’dagi karyerasida muvaffaqiyatsiz bo‘lganidan keyin u 20th Century Fox bilan shartnoma imzolagan. 1930-yillar Gloriya uchun juda ham samarali kechgan. 1933-yildagina uning ishtirokidagi film premyerasi bo‘lgan. Shu bilan u 10 yil ichida 28 ta kartinada suratga tushgan.
Bu yillarda Ketrin Xepbern, Joan Krouford, Judit Barret, Frensis Dreyk, Telma Toddlar Gollivudda mashhurlikka erishgan bo‘lgan, Styuart esa iste’dod borasida ham go‘zallik bobida ham ulardan qolishmagan. Uning karyerasiga Ikkinchi jahon urishining ta’siri bo‘lgan. Og‘ir yillar davomida Gloriya deyarli suratga tushmagan. Qolaversa, qizini katta qilishi kerak bo‘lgan. Kun ko‘rish uchun u mebel do‘koniga sotuvchi bo‘lib ishga kirgan.
1940-yil o‘rtalarida Gloriya kinoga qaytgan, ammo u karyerasining eng muvaffaqiyatli davridagi singari ko‘p rol ijro qilmagan. Oradan bir necha yil o‘tib esa u suratga olish jarayonlaridan charchaganini ma’lum qilgan. Barcha yangi ssenariylar bilan tanishib chiqib, keskin rad qilganidan keyin bekorga vaqt sarflayotganlarini tushunib yetgan Gollivuddagilar uni tinch qo‘yishga qaror qilgan. Keying 30 yil davomida u kitob yozish, rassomlik bilan shug‘ullangan. U tomonidan chizilgan kartinalar Nyu-York, AQSh va Yevropaning boshqa yirik shaharlarida galereyalardan o‘rin olgan. Kitoblarini esa uning o‘zi chop etgan. Adadi kam bo‘lgan kitoblardan tushgan mablag‘ kundalik xarajatlar uchungina yetgan. Dam olganidan keyin 1975-yilda katta ekranlarga qaytgan aktrisa, 1982-yilda “Mening eng yaxshi yilim”da suratga tushgan. 1997-yilda esa Jeyms Kemeronning “Titanik” filmida rol ijro qilish uchun taklif qilingan. Bir haftalik faoliyati uchun suratga olish maydonchasidagi eng keksa aktrisa 10 ming dollarga ega bo‘lgan. 1998-yilda “Titanik” filmi uchun 11 ta “Oskar” mukofoti berilgan. Gloriya Styuart esa People jurnalining Dunyoning eng maftunkor 50 odamlari ro‘yxatidan o‘rin olgan.
Oradan bir yil o‘tib uning “Men faqat umid qilishda davom etaman” nomli avtobiografiyasini taqdim etilgan. Shundan keyin uning sharafiga G‘alaba xiyobonida yulduzcha qo‘yilgan. 2004-yilda Gloriya so‘nggi marta suratga tushgan. 95 yoshida unga o‘pka saratoni tashxisi qo‘yilgan. Shunga qaramay, u jiddiy kasallikka e’tibor bermaslikka uringan. Yoshi sabab suratga tushmay qo‘ygan va kamdan-kam hollarda intervyu bergan aktrisaning 100 yillik yubileyida boshqa yulduzlar qatorida Jeyms Kemeron ham ishtirok etgan. U 2010-yil 26-sentabrda nafas yetishmovchiligidan vafot etgan.
Mavzuga doir:
