O‘zbekiston Senatining Mudofaa va xavfsizlik masalalari qo‘mitasi a’zolari 23-noyabr kuni Farg‘ona viloyatining barcha hududlarida gaz-ballon bilan jihozlangan avtomobillar xavfsizligini ta’minlash bo‘yicha ko‘rilayotgan choralarni o‘rganib chiqqan, 24-noyabrda esa viloyatdagi ahvol va ko‘rilayotgan choralar muhokamasiga bag‘ishlangan yig‘ilish o‘tkazgan.

Senator Tolibjon Madumarov Farg‘ona viloyatida gaz-ballon o‘rnatilgan avtomobillarning texnik holatini ko‘zdan kechirmoqda, 2021-yil 23-noyabr.

Foto: Senat axborot xizmati

Yig‘ilishda, jumladan, Farg‘ona viloyatida jismoniy shaxslarga tegishli 341 820 ta avtotransport vositasining 249 664 tasi (73 foizi) va 31 814 ta yuk tashish uchun mo‘ljallangan transport vositalarining 29 214 tasi (91,7 foizi) gaz ballon bilan jihozlangani ma’lum qilingan. Ayni vaqtda “olib borilgan ishlar bilan bir qatorda ba’zi kamchilik va muammolar borligi ham ko‘rsatib o‘tilgan”. Masalan, “gaz ballonlariga ortiqcha bosimda gaz to‘ldirilib, yaroqlilik muddati 15 yildan ortiq bo‘lgan gaz ballonlaridan ham foydalanish holatlari ko‘payib bormoqda”.

Senatning Mudofaa va xavfsizlik qo‘mitasi raisi Qutbiddin Burhonov Farg‘ona shahrida gaz-ballon o‘rnatilgan avtomobillar masalasiga bag‘ishlangan muhokamada nutq so‘zlamoqda, 2021-yil 24-noyabr.

Foto: Senat axborot xizmati

“Jumladan, 2020-yil va joriy yilning 10 oyi davomida respublika bo‘yicha gaz ballonlari o‘rnatilgan transport vositalarida 17 ta portlash holati sodir bo‘lgan va ularning bittasi aynan Farg‘ona viloyatida qayd etilgan”, — deyiladi Senat axborot xizmati xabarida. Aynan mana shu nuqtada noaniqlik bor — O‘zbekistonda so‘nggi bir yilning o‘zida gaz-ballonli avtomobillar portlashi bilan bog‘liq kamida 17 ta holat yuz bergan (Senat axborot xizmati ushbu raqam Bosh prokuraturadan olinganini bildirdi).

Dekabrdan dekabrgacha — jami 17 ta holat

2021-yil 1-yanvardan to bugun (7-dekabr)gacha gaz-ballon o‘rnatilgan avtomobillarning portlashi bilan bog‘liq kamida 16 ta holat OAVda yoritilgan (avgust oyida Namanganning Uchqo‘rg‘on tumanidagi noaniq qolgan holat ham — avval yong‘in chiqib, so‘ng avtomobildagi gaz-ballon portlaganmi yo gaz-ballon portlagach yuz bergach, yong‘in kelib chiqqanmi — hisobga olinsa, 2021-yilning o‘zida 17 ta holat yuz bergan bo‘lib chiqadi).

Jumladan, 25-yanvar kuni Toshkentning Mirzo Ulug‘bek tumanida gaz-ballon o‘rnatilgan Nexia, 27-mart kuni Sirdaryoning Guliston shahrida Damas portlagan. 13-aprel kuni Jizzax shahrida yurib ketayotgan chiqindi tashuvchi Isuzu yuk mashinasining gaz balloni portlashi oqibatida yo‘l chetida turgan ota-bola tan jarohati olgan (oxir-oqibat bolaning oyog‘i kesib tashlangan). 22-aprel kuni Qashqadaryoning Qarshi tumanida gaz-zapravkadagi Nexia’ning gaz-balloni portlab ketishi oqibatida bir kishi halok bo‘lgan, gaz-zapravkaning bir xodimi jarohatlangan.

Chiroqchi tumanida 22-may kuni harakatlanib ketayotgan Nexia’ning gaz-ballon portlashi oqibatida ikki kishi halok bo‘lgan, avtomobilning o‘zi esa mutlaqo yaroqsiz ahvolga kelgan edi.

Foto: Telegram

22-may kuni ikkita baxtsiz hodisa qayd etilgan — biri, senatorlar ta’kidlaganidek, Farg‘ona viloyatida, ikkinchisi esa Qashqadaryoda. Quvada gaz to‘ldirayotgan “Jiguli”ning gaz-balloni portlashi oqibatida mashinaning 32 yoshli haydovchi va mashina yaqinida turgan yana bir 58 yoshli fuqaro jarohatlangan. Chiroqchida esa yurib ketayotgan Nexia’ning gaz-balloni portlab, ikki kishining umriga zomin bo‘lgan, yana bir kishi tan jarohatlari bilan kasalxonaga yotqizilgan.

1-iyun kuni odamlar o‘limiga sabab bo‘lgan yana bir hodisa Sirdaryo viloyatining Oqoltin tumanida yuz bergan — yo‘lda harakatlanib ketayotgan Lacetti’ning gaz balloni yorilib ketishi oqibatida ikki kishi halok bo‘lgan, yana ikki kishi tan jarohatlari bilan kasalxonaga yotqizilgan. 9-iyun kuni Samarqand shahridagi gaz-zapravkada Nexia avtomobilining balloni portlab ketgan (jabrlanganlar yo‘q). 28-iyul kuni shunga o‘xshash voqea Surxondaryoning Muzrabot tumanidagi gaz-zapravkada UAZ avtomobili bilan sodir bo‘lgan.

Sirdaryoning Oqoltin tumanida 1-iyun kuni harakatlanib ketayotgan Lacetti’ning gaz-ballon uskunasi portlashi oqibatida ikki yo‘lovchi voqea joyida halok bo‘lgan, haydovchi va yana bir yo‘lovchi turli tan jarohatlari bilan shifoxonaga yotqizilgan edi.

Foto: Telegram / @Sirdaryo

8-sentabr kuni Jizzaxning Sharof Rashidov tumanida “Gazel” yuk mashinasi gaz-balloni portlagan, bir kishi jarohatlangan. 29-sentabr kuni Qashqadaryoning G‘uzor tumanidagi gaz-ballonli Lacetti portlagan, bir kishi tan jarohati olgan. 2-oktabr kuni Surxondaryoning Jarqo‘rg‘on tumanidagi gaz-zapravkada Lacetti avtomobili portlab ketgan. 14-oktabrda Buxoroda yuk mashinasiga aylantirilgan gaz-ballonli “Volga” portlagani haqida xabar berilgan.

27-oktabr va 4-noyabr kunlari Qashqadaryoning Chiroqchi tumanida gaz-ballon o‘rnatilgan Nexia’lar ishtirokida portlashlar yuz bergan (jami to‘rt kishi tan jarohati olgan). 18-noyabr kuni Qoraqalpog‘istonning Qorao‘zak tumanidagi gaz-zapravkada Matiz avtomobili portlab ketgan, uch kishi tan jarohati olgan. Shunday qilib, avtomobillarda gaz-ballon portlashi bilan bog‘liq 2021-yilning o‘zida yuz bergan kamida 16 ta hodisa oqibatida dastlabki ma’lumotlar bo‘yicha 7 kishi halok bo‘lgan, 17 kishi tan jarohati olgan.

Buxoro viloyatida 2020-yil 20-mart kuni Nexia-3 avtomobiliga o‘rnatilgan gaz ballonining portlashi oqibatida 50 va 24 yoshli ikki ayol va 3 yoshli bolakay halok bo‘lgan edi.

Foto: IIV huzuridagi Tergov departamenti

Agar bunday baxtsiz holatlar hisob-kitobini 2020-yil dekabr oyidan boshlasa, portlashlar soni 17 tani tashkil etadi — 22-dekabr oqshomida Buxoro shahrida harakatlanib ketayotgan “Jiguli” avtomobilidagi gaz-ballon portlab ketgan, haydovchi tan jarohati olgan. Bundan tashqari 2020-yilda yana kamida to‘rtta (Sirdaryoda bitta, Andijonda bitta, Buxoroda ikkita) portlash yuz bergan. Xususan, 20-mart kuni Buxoroda Nexia-3 avtomobiliga o‘rnatilgan gaz-ballon portlashi oqibatida uch kishi halok bo‘lgan — 2020—2021-yillarda yuz bergan va jamoatchilikka oshkor qilingan boshqa biror holatda bu qadar ko‘p qurbon bo‘lmagan.