O‘zbekistonda hafta oxirlarida yomg‘ir yog‘ib, ayrim joylarda qorga aylanishi mumkin

“O‘zgidromet” hafta davomida qaday ob-havo bo‘lishini ma’lum qildi.

Unga ko‘ra, 10-yanvar, dushanba kuni O‘zbekiston hududi bo‘yicha nisbatan salqin havo massasi ta’siri saqlanib turadi. Kunduz kungi havo harorati 3-8 daraja iliqni tashkil etadi.

11—13-yanvar kunlari respublika hududlari bo‘yicha asosan quruq ob-havo bo‘lishi kutilmoqda, faqat 13-yanvarda respublikaning tog‘oldi va tog‘li hududlarida ba’zi joylarda yomg‘ir, baland tog‘li hududlarda qor yog‘adi.

Respublika hududidan sovuq havo massasi asta-sekin chekinadi va hafta o‘rtasiga kelib, havo harorati kechalari 3-6 daraja iliqqacha, kunduz kunlari 9-12 daraja iliqqacha ko‘tariladi.

14-yanvarda O‘zbekston hududiga Kaspiy dengizi hududlaridan nisbatan nam, ammo iliq havo massasi kirib keladi. Respublikaning katta qismida yomg‘ir yog‘adi, shimoliy hududlarda qorga aylanishi mumkin. Ayrim tumanlarda shamol 15-20 metr/sekundgacha kuchayishi kutilmoqda. Havo harorati yana 2-4 darajaga ko‘tariladi va qish faslining o‘rtasi uchun bo‘lgan me’yoriy qiymatlardan 3-5 darajaga yuqori bo‘ladi.

Respublikaning ayrim hududlarida tuman kuzatiladi.

Avvalroq markaz 2022-yilning yanvar oyiga O‘zbekiston bo‘yicha ob-havo prognozini e’lon qilgandi.