Toshkent viloyati hokimligi ijtimoiy tarmoqlarda “Chimyon dam olish maskani”ga qo‘lbola to‘siqlar qo‘yilgan yuzasidan tarqalgan xabarlarga munosabat bildirdi.
Ijtimoiy tarmoqlarda xalq orasida “Chimyon dam olish maskani” deb ham yuritiladigan hududda dam oluvchilarning e’tirozlari aks etgan videolavha tarqaldi. Hokimlik izohida keltirilishicha, bu yerdagi qo‘lbola to‘siqlar vaqtinchalik chora sifatida o‘rnatilgan, ayni paytda dam oluvchilar bilan bog‘liq ko‘ngilsiz holatlar yuz bergani haqida ma’lumotlar yo‘q.
“Bugungi kunda dam olish maskaniga tashrif buyurayotgan mahalliy va xorijiy sayyohlarning xavfsizligini ta’minlash maqsadida tegishli mutasaddi tashkilotlar ishtirokida ishchi guruh tashkil qilingan va hududdagi (ot, kvadratsikl, snoubort, tyubing, chang‘i va boshqa) ko‘ngilochar sport turlari bilan shug‘ullanuvchi sport ixlosmandlari va yakka tartibdagi dam oluvchilar o‘rtasida turli xil ko‘ngilsiz holatlar yuzaga kelishining oldini olish choralari ko‘rilmoqda”, — deyiladi munosabatda.
Ma’lumot uchun, O‘zbekiston prezidentining tegishli qaroriga asosan Bo‘stonliq tumani Chimyon qishlog‘idagi “Paxtakor sport bazasi” sportning qishki va murakkab texnik turlari bo‘yicha Respublika oliy sport mahorati maktabi balansiga o‘tkazilgan.
Eslatib o‘tamiz, Yangi yil bayrami munosabati bilan e’lon qilingan dam olish kunlari Toshkent viloyatining Bo‘stonliq tumaniga ko‘plab fuqarolar tashrif buyurishi kutilayotgani sababli avtomobil yo‘llarida tirbandliklarning oldini olish va harakat xavfsizligini ta’minlash maqsadida, 2021-yil 31-dekabrdan 2022-yil 5-yanvarga qadar Bo‘stonliq tumanining dam olish zonalaridan o‘tgan avtomobil yo‘llarida harakatlanish uchun ayrim cheklovlar kiritilgandi.
Izoh (0)