O‘zbekiston Respublikasi Prezidenti Shavkat Mirziyoyev tomonidan 2021-yil 30-dekabr kuni o‘tkazilgan selektor yig‘ilishida berilgan topshiriqlarning ijrosini ta’minlash uchun “O‘zbekneftgaz” AJ va uning tasarrufdagi tashkilotlarda kuchaytirilgan ish rejimi tashkil etildi.
“O‘zbekneftgaz” AJ boshqaruvi raisi Mehriddin Abdullayevning topshirig‘iga asosan, Yangi yil bayrami munosabati bilan berilgan dam olish kunlarida ishlab chiqarish va qayta ishlash ishlari uzluksiz tashkil etildi.
Qish mavsumida hamda bayram kunlari aholi, sanoat va xalq xo‘jaligi iste’molchilarini tabiiy gaz, suyultirilgan gaz, benzin va dizel yonilg‘ilari bilan ta’minlashda uzulishlarning oldini olish, barcha qazib chiqarish, qayta ishlash, ishlab chiqarish korxonalarining bir maromda ishlashini navbatchilar to‘liq monitoring qilib borishadi.
Shu bois, “O‘zbekneftgaz” AJ tasarrufidagi barcha korxona va tashkilotlarda ishlab-chiqarish jarayonlarining bir maromda ishlashini ta’minlash hamda uzulishlarni oldini olish maqsadida 2022-yilning 1—15-yanvar kunlari kuchaytirilgan ish rejimi tashkil qilinishi belgilandi.
Ayni ushbu kunlarda jamiyat tasarrufdagi barcha korxona va tashkilot rahbarlari mas’ulligida 2022-yilning 1—15-yanvar kunlari kecha-yu kunduz navbatchilik tashkil etiladi.
Barcha korxonalarning birinchi rahbarlari kuchaytirilgan ish rejimi doirasida shaxsan ish joyida bo‘lib, ishlab chiqarish jarayonlarining uzluksizligini ta’minlashdi.
Bundan tashqari, korxonalar rahbarlari obyektlarni qo‘riqlash masalalariga e’tibor berib, rahbar, muhandis-texnik va ishchi xodimlar tomonidan xavfsizlik texnikasi, mehnat muhofazasi, yong‘in va harakat xavfsizligi talablariga qat’iy amal qilinishi ta’minlanishi shart.
Boshqaruv raisi tomonidan korxona va tashkilotlarining barcha obyektlari, qurilma, kon va sexlarida shu kunlari faoliyat olib borayotgan ishchi xodimlarning ish joylariga borib-kelishlari, ovqatlanish va boshqa zaruriy tadbirlarni e’tiborga olgan holda, qulay ish sharoitlarini yaratish yuzasidan qo‘shimcha choralar belgilab berildi.
O‘z navbatida aholi talablarini inobatga olgan holda, “Buxoro neftni qayta ishlash zavodi” MChJ va “Neft bazalari” MChJlari tomonidan aholi, sanoat va xalq xo‘jaligi iste’molchilaring sifatli benzin, dizel yonilg‘isi, neft mahsulotlari bilan ta’minlashda uzilish va tanqisliklarga yo‘l qo‘ymaslik choralari ko‘riladi.
UNG-Petro MChJ, “Chinobod neft bazasi” va “Kuchlik neft bazasi” rahbarlarining shaxsan nazorati ostida iste’molchilarni benzin va dizel yonilg‘isi bilan kecha-yu kunduz ta’minlash, narxlarning sun’iy ravishda o‘sishining oldini olish choralarini ko‘rgan holda AYoQShlarda tungi reydlar tashkil etiladi.
“O‘zbekneftgaz” AJ matbuot xizmati
Izoh (0)