Joriy yil noyabr oyida ish boshlagan Navoiy viloyati hokimi vazifasini bajaruvchi Normat Tursunov kichik sanoat zonalari tashkil etish va tadbirkorlik faoliyatini rivojlantirish tizimi bilan tanishish maqsadida Namanganga keldi. Bu haqda “Daryo” muxbiri Azizbek Abduvaliyev xabar bermoqda.
Navoiy delegatsiyasi tarkibidan viloyat hokimining o‘rinbosarlari, shahar-tuman hokimlari o‘rin oldi.
Mehmonlar Namangan shahridagi “Barkamol avlod”, “Yoshlik”, “Dashtbog‘”, “Orzu” va “Yuksalish” kichik sanoat zonalari faoliyati bilan tanishdi.
“Gabon tekstil”, “Ko‘ksaroy”, “Ideal”, Glass Expo, “Zamin kiyim sanoat”, “Fabrika Nashe”, Aisha home tekstile kabi Namanganning yetakchi korxonalari, “Usta Komil” gulchilik markazida bo‘ldi.
“Namanganlik tadbirkorlarning ta’rifini ko‘p eshitganmiz. Endi ular olib borayotgan ishlarni o‘z ko‘zimiz bilan ham ko‘rdik. Ularni Navoiyga ham taklif etamiz. Viloyatlarimiz o‘rtasidagi hamkorlik, o‘zaro tajriba almashish ikki hudud rivoji uchun ham salmoqli hissa qo‘shadi”, — dedi Normat Tursunov.
Mehmonlar prezident tashrif buyurgan “Bunyodkor” mahallasida ham bo‘lib, zamonaviy mahalla idorasi binosi, IT-markaz, kutubxona, qad rostlayotgan ko‘p qavatli uylar bilan ham tanishdi.
Navoiy delegatsiyasiga safar davomida Namangan viloyati hokimi Shavkat Abdurazzaqov va Namangan shahri hokimi G‘ofir Jamolov hamrohlik qildi.
Ma’lumot uchun, bugungi kunda Namangan viloyatida 73 ta kichik sanoat zonasi faoliyat ko‘rsatmoqda. Ularda 6,7 trillion so‘mlik 1154 ta loyiha amalga oshirilmoqda.
Izoh (0)