Жорий йил ноябрь ойида иш бошлаган Навоий вилояти ҳокими вазифасини бажарувчи Нормат Турсунов кичик саноат зоналари ташкил этиш ва тадбиркорлик фаолиятини ривожлантириш тизими билан танишиш мақсадида Наманганга келди. Бу ҳақда «Дарё» мухбири Азизбек Абдувалиев хабар бермоқда.
Навоий делегацияси таркибидан вилоят ҳокимининг ўринбосарлари, шаҳар-туман ҳокимлари ўрин олди.
Меҳмонлар Наманган шаҳридаги «Баркамол авлод», «Ёшлик», «Даштбоғ», «Орзу» ва «Юксалиш» кичик саноат зоналари фаолияти билан танишди.
«Габон текстил», «Кўксарой», «Идеал», Glass Expo, «Замин кийим саноат», «Фабрика Наше», Aisha home tekstile каби Наманганнинг етакчи корхоналари, «Уста Комил» гулчилик марказида бўлди.
«Наманганлик тадбиркорларнинг таърифини кўп эшитганмиз. Энди улар олиб бораётган ишларни ўз кўзимиз билан ҳам кўрдик. Уларни Навоийга ҳам таклиф этамиз. Вилоятларимиз ўртасидаги ҳамкорлик, ўзаро тажриба алмашиш икки ҳудуд ривожи учун ҳам салмоқли ҳисса қўшади», — деди Нормат Турсунов.
Меҳмонлар президент ташриф буюрган «Бунёдкор» маҳалласида ҳам бўлиб, замонавий маҳалла идораси биноси, IT-марказ, кутубхона, қад ростлаётган кўп қаватли уйлар билан ҳам танишди.
Навоий делегациясига сафар давомида Наманган вилояти ҳокими Шавкат Абдураззақов ва Наманган шаҳри ҳокими Ғофир Жамолов ҳамроҳлик қилди.
Маълумот учун, бугунги кунда Наманган вилоятида 73 та кичик саноат зонаси фаолият кўрсатмоқда. Уларда 6,7 триллион сўмлик 1154 та лойиҳа амалга оширилмоқда.
Изоҳ (0)