O‘zbekistonda harbiylashtirilgan soqchilik va qorovullik bo‘linmalari tashkil etiladi

Vazirlar Mahkamasining qarori bilan Milliy gvardiya Qo‘riqlash bosh boshqarmasining harbiylashtirilgan soqchilik bo‘linmalari va qorovullik bo‘linmalari to‘g‘risidagi nizom tasdiqlandi.

Nizomga ko‘ra, harbiylashtirilgan soqchilik bo‘linmalari va qorovullik bo‘linmalari toifalangan obyektlarni, davlat boshqaruvi organlari va xo‘jalik birlashmalari, jismoniy va yuridik shaxslarning obyektlarini, ularning mol-mulkini qo‘riqlash uchun tashkil etiladi.

Ular tomonidan quyidagi xizmatlar harbiylashtirilgan soqchilik bo‘linmalari tomonidan ko‘rsatiladi:

• obyekt yoki uning bir qismini qo‘zg‘almas post orqali qo‘riqlash va xavfsizligini ta’minlash;
• piyoda yoki transport vositasida, shuningdek, boshqa vositalarda muayyan hududdagi obyektlarni yoki ularning hududlarini yo‘nalish bo‘ylab qo‘riqlash;
• qorovullik bo‘linmalari tomonidan – qo‘zg‘almas post orqali obyekt yoki uning bir qismini qo‘riqlash va xavfsizligini ta’minlash.

Fuqarolar kamida umumiy o‘rta yoki o‘rta maxsus ma’lumotga ega, sog‘lig‘ining holati va jismoniy tayyorgarligi bo‘yicha xizmat majburiyatlarini bajarishga qodir bo‘lishi lozim.

Erkak nomzodlar Qurolli Kuchlar safida harbiy xizmatni o‘tagan bo‘lishi kerak.

Mazkur bo‘linmalar boshliqlar tarkibiga Milliy gvardiya va boshqa huquqni muhofaza qiluvchi organlarda xizmat qilib, nafaqaga bo‘shagan nomzodlar suhbat asosida, jismoniy tayyorgarligi va salomatligi holatiga ko‘ra ishga qabul qilinishi mumkin.

Nizomga ko‘ra, harbiylashtirilgan soqchilik bo‘linmalari va qorovullik bo‘linmalari shaxsiy tarkibi bilan maxsus dasturlar asosida quyidagi tartibda xizmat va jangovar tayyorgarlik mashg‘ulotlari o‘tkaziladi:

• harbiylashtirilgan soqchilik bo‘linmalarida – oyiga 8 soat (o‘quv yilida 80 soat);
• qorovullik bo‘linmalarida – oyiga 4 soat (o‘quv yilida 40 soat).