Rossiyaning mashhur aktrisasi va eng sirli ayollaridan biri – Alisa Freyndlix 2021-yil 8-dekabr kuni 87 yoshni qarshi oldi.
“Ishdagi ishq”, “Uch mushketyor” va “Somon shlyapa” filmlarining yulduzi, Tovstonogov nomidagi Katta drama teatri aktrisasi yillar davomida shuhrat qozonganiga qaramay, hanuzgacha sirli ayol bo‘lib qolmoqda. U deyarli jurnalistlar bilan aloqa qilmaydi va ijtimoiy tarmoqlarda akkauntlari mavjud emas.
“Ishdagi ishq” filmiga sinovsiz tasdiqlangan
Alisa Freyndlix 1977-yilda Eldar Ryazanovning “Ishdagi ishq” filmi chiqishi bilan chinakam mashhurlikka erishdi. Biroq uning katta filmdagi debyuti ikki yil oldin bo‘lgani ko‘pchilikka ma’lum emas. Bir vaqtlar Alisa Freyndlix eng mashhur “Taqdir hazili yoki qushdek yengil bo‘ling!” filmidagi Nadya Sheveleva roliga asosiy da’vogarlardan biri edi.
Odatda ommaviy axborot vositalari badiiy kengash a’zolari bunga to‘sqinlik qilgani haqida yozadi. Aytishlaricha, ularga Freyndlixning ijrosi yoqmagan. Ammo Eldar Ryazanovning qizining aytishiga ko‘ra, aslida rejissorning o‘zi aktrisani tasdiqlashdan bosh tortgan.
“Otamning aytishicha, sovet aktrisalari muhabbatni chet ellik ayollar kabi nozik tarzda tasvirlay olmagan, ular shunchaki bunga moslashmagan edi, deydi Olga Ryazanova. – Shuning uchun ham dadam barcha sinovlar, jumladan, Alisaning natijalaridan mamnun emas edi. So‘ngra tom ma’noda, so‘nggi daqiqada, 1972-yilda ‘Sevgi anatomiyasi’da bosh rolni o‘ynagan Barbara Brilska paydo bo‘ldi va hamma narsa o‘z-o‘zidan boshlanib ketdi. Ammo Eldar Ryazanov o‘zining navbatdagi loyihasida Alisa Freyndlixni hech qanday sinovlarsiz bosh qahramon roliga tasdiqladi”.
“Bu o‘sha davrda aqlga sig‘maydigan ish edi!” – deb eslaydi Rossiya xalq artisti Svetlana Nemolyayeva. U “Ishdagi ishq” asosiy salbiy qahramon Samoxvalovning sobiq sevgilisi Olga Rijovani o‘ynagan.
Badiiy kengashlar har qanday rol va ayniqsa Alisa Freyndlix tomonidan ijro etilgan asosiy rol uchun kamida ikkita va ideal holda uchta yoki to‘rtta nomzod bo‘lishi kerakligini talab qildi. Ammo Eldar Aleksandrovich o‘sha paytda shunday shon-shuhratga ega ediki, tomoshabinlar ham, rahbariyat ham shunchalik sevganidan uni yarim yo‘lda kutib olardi.
“Improvizatsiya qirolichasi”
“ ‘Ishdagi ishq’, – deb eslaydi, Svetlana Nemolyayeva, qisman Alisa Freyndlixning o‘zi va uning improvizatorlik qobiliyati tufayli juda samimiy chiqdi va chinakam muvaffaqiyatga erishdi”.
“Alisa Freyndlix improvizatsiya qirolichasi, buni ishonch bilan aytaman, – deydi aktrisa. – Butun filmning kamida ikkita asosiy sahnasi – Novoselsev Alisa ijro etgan qahramonni avval kokteyl, keyin qo‘ziqorin va she’rlar bilan ko‘nglini olayotganida hamda film so‘ngidagi janjal aktrisa tomonidan to‘liq improvizatsiya qilingan. Ssenariyda faqat umumiy voqealar va ularning replikalari yozilgan, qolgan hamma narsa aktrisaga bog‘liq edi”.
“Ishdagi ishq” filmining Leningrad premyerasi paytida Alisa Freyndlix o‘z uyida katta ziyofat uyushtirdi va u yerda Eldar Ryazanovning qizi Olga, suratga olish guruhi, do‘stlari va qarindoshlarini taklif qildi.
“Ko‘p yillar davomida muloqot qilishimizga qaramay, men Alisaning xarakteriga aniq ta’rif bera olmayman, – deydi Oleg Basilavshili – u tirik odam. Ijodkor odam. Eng muhimi, u qandaydir aktyorlik fanatizmiga mutlaqo begona. U filmlarda suratga tushish va teatrda rol o‘ynashga juda oddiy va to‘g‘ri munosabatda bo‘ladi. Bu ishdan yaxshi narsa chiqishi mumkin, degan umidda ishlaydi. Bundan tashqari, Alisa juda talabchan odam, birinchi navbatda o‘zi uchun. Agar u mashq qilsa, natijaga erishmaguncha, bitta sahnani o‘n martalab o‘ynashi mumkin.
Yulduzlik kasaliga chalinmagan
Bir paytlar jurnalistlar ham Alisa va Basilashvilining ishqiy aloqalari borligini yozgan. Buning ajablanarli joyi yo‘q: o‘sha davrining ikkita yulduzi, ekranda va sahnada ajoyib juftlik, nihoyatda yaqin do‘st. Ularni o‘zlarining samimiy “ishdagi ishqi”dan shubhalanmaslik qiyin edi …
“Uning o‘z oilasi bor, mening ham, – deya xulosa qildi aktyor. – Biz bir-birimizga juda yaxshi munosabatda bo‘lamiz va har qanday holatda bo‘lgani kabi bizning barcha ishqiy munosabatlarimiz faqat suratga olish joyida, mashg‘ulotlar va chiqishlar paytida yashaydi”.
Alisa Freyndlix ko‘p yillar davomida sahnada ijod qilayotgani, uning har bir obrazi tomoshabinlar tomonidan olqishga sazovor bo‘lgani hamda kino va teatr tanqidchilari tomonidan sinchkovlik bilan o‘rganilgan bo‘lsa-da, uning kundalik va oddiy hayotda qanday ekani haqida juda kam narsa ma’lum.
“Unda qandaydir introvert (o‘z ichki olamiga beriluvchan, atrofidagi odamlarga aralashmaydigan, o‘z-o'zini nazorat qiladigan inson), yopiqlik bor. Menimcha, bu nemis ildizlari bilan bog‘liq”, – deydi rejissor-prodyuser, Leningrad televideniyasining afsonasi Irina Taymanova. U Alisani qirq yildan ortiq biladi. “Shunday bo‘lsa-da, unda hech qanday yulduzlik kasali yo‘q. Alisa juda ochiq odam, do‘stona, odamlarga moyil. Ishonchim komilki, u Katta drama teatridagi barcha sahna ishchilarining ismlarini biladi – rekvizitorlardan tortib yorug‘lik ustasigacha. Hech qachon ovozini ko‘tarmaydi. Men Alisaning jahli chiqqanini ikki martagina ko‘rganman. Uning ko‘zlari va ovozi po‘latga aylanadi. Tamom, shuning o‘zi yetarli. Men uning uslubini juda yaxshi ko‘raman – qat’iy va nafis, hazil tuyg‘usi va bir xil fe’l-atvorga ega inson”.
Irina Taymanovaning so‘zlariga ko‘ra, Alisa Freyndlix zargarlik buyumlariga deyarli befarq, faqat firuza toshini yaxshi ko‘radi va shohona nimadir taqishni rad etadi. Uning so‘zlariga ko‘ra, ushbu kichik tosh ayollarga ichki go‘zalligini ochib berishga va muvaffaqiyatsizlikdan himoya qilishga yordam beradi.
“Shunga qaramay, uni ingichka sigaretsiz tasavvur qilishning iloji yo‘q, – deydi Irina Taymanova. – Chekish ham uning obraziga juda mos tushadi. Rostini aytsam, kasallikdan keyin u bu sevimli mashg‘ulotini tark etishiga umid qilgandim. Ammo yo‘q, bilishimcha, u o‘zgarmaslikka qaror qilgan.
Koronavirusni yengib, sahnaga qaytdi
2021-yil aktrisa uchun qiyin bo‘ldi. Bahorda u koronavirus bilan kasalxonaga yotqizilgan. Sitokin bo‘roni – insonning immunitet tizimi o‘z tanasiga hujum qila boshlaydigan jiddiy o‘pka kasalligiga chalindi. U qiyinchilik bilan tuzaldi: ko‘p yillik chekish natijasi edi bu.
“Bundan tashqari, virus tomirlarni zo‘riqtirgan – bir muncha vaqt uning qon bosim yuqori bo‘ldi, deydi shifokorlar. Biz intensiv terapiya yordamida ikkalasini ham bartaraf eta oldik”.
Qiyinchiliklar bilan tuzalib ketgan Alisa Freyndlix o‘zining sevimli Tovstonogov nomidagi Katta drama teatriga eson-omon qaytib keldi. 2021-yil 26-dekabr kuni uni dramaturg Ivan Viripayev tomonidan sahnalashtirilgan “Hayajon” spektaklidagi roli bilan sahnaga qaytadi.
Mavzuga doir:
Izoh (0)