Amerikaning CNN telekanali boshlovchisi Kris Kuomo noma’lum muddatga ishdan chetlatildi. Kris Kuomo — ayollarga shilqimlik qilishda ayblanib iste’foga chiqqan Nyu-Yorkning sobiq gubernatori Endryu Kuomoning ukasi.

Kris Kuomo

Foto: CNN

CNN matbuot xizmatining xabar berishicha, telekanal Kris Kuomoning shilqimlik haqidagi da’volarga javob qaytarishda akasiga yordam bergani yuzasidan ichki tekshiruv o‘tkazmoqda.

Bunday yordam haqida birinchi marta may oyida ma’lum bo‘lgan. The Washington Post nashrining xabar berishicha, ayollarga tegajog‘lik haqidagi da’volardan keyin Kris Kuomo akasining jamoasi bilan strategiya mashg‘ulotlarida qatnashgan. CNN ushbu ishtirokni “noma’qbul” deb atagan, biroq boshlovchini ishdan olib tashlamagan. Kris Kuomoning o‘zi esa akasining jamoasiga yordam berib xato qilganini aytgan va kechirim so‘ragan.

Ammo joriy hafta Nyu-York prokurorining ofisi Kris Kuomo bilan akasining yordamchilari o‘rtasidagi aloqalar ilgari o‘ylanganidan ham yaqinroq bo‘lganini ko‘rsatuvchi hujjatlarni e’lon qildi, deb xabar berdi CNN matbuot xizmati. Xususan, Kris Kuomo akasiga qarshi yana kim ayblov qo‘ymoqchi ekanini aniqlashda o‘zining jurnalistik aloqalaridan foydalangan.

Kris Kuomo 2018-yildan beri muntazam ravishda CNN telekanalida Cuomo Prime Time tahliliy yangiliklar dasturini olib borardi. Dastur ish kunlari soat 21:00 da efirga uzatilardi va CNN’ning eng ommabop shoularidan biri edi.

Nyu-York sobiq gubernatori Endryu Kuomo 2021-yilning fevral oyida ikki sobiq xodimasi tomonidan shilqimlikda ayblandi. Keyinroq da’vogarlarga yana to‘qqiz nafar ayol qo‘shilgan. Nyu-York shahar prokuraturasi nazorati ostida o‘tkazilgan tergov ular haqiqatni gapirayotganini aniqladi. Ayollarning ma’lum qilishicha, Kuomo ularga tegajog‘lik qilib, nomaqbul gaplar gapirgan.

Ayblovlarga chap bera olmagan Endryu Kuomo 2021-yilning avgust oyida iste’foga chiqdi. 2022-yilda bo‘lib o‘tadigan keyingi saylovlarga qadar gubernator yordamchisi Keti Xokul Nyu-York gubernatori lavozimida ishlaydi. U Nyu-York shtatini boshqargan birinchi ayolga aylandi.