O‘zbekiston Transport vazirligi, Davlat bojxona qo‘mitasi va Davlat xavfsizlik xizmati Chegara qo‘shinlari turkmanistonlik hamkasblari bilan birgalikda 26-noyabrdan boshlab davlat chegarasi orqali ikkita o‘tkazish punkti faoliyatini tiklash ustida ishlamoqda, deb xabar berdi vazirlik matbuot xizmati.

Foto: Transport vazirligi

Qayd etilishicha, 2020-yilda koronavirus pandemiyasi sababli “Xo‘jayli—Kunya-Urgench” hamda “Shovot—Dashoguz” chegara o‘tkazish punktlari yopilgan edi. Ular bugungi kunda xalqaro yuk tashuvlari uchun faoliyat yuritayotgan “Olot” chegara o‘tkazish punktiga qo‘shimcha bo‘lishi kerak.

26-noyabrdan sanitariya-epidemiologiya tadbirlariga qat’iy rioya etgan holda neytral zonada tirkama va yarim tirkamalarni kontaktsiz almashish yo‘li bilan qayta tiklash kutilmoqda. Ikki punktning neytral zonalarida sinov yuk tashuvlari 25-noyabr kuni amalga oshirildi.

Bu haqda 18-noyabr kuni O‘zbekiston–Turkmaniston ishchi guruhlarining transport va logistika bo‘yicha videokonferensaloqa yig‘ilishi formatidagi uchrashuvida kelishuvga erishildi, deya aniqlik kiritdi vazirlik.