Liviya Milliy birlik hukumati Mudofaa vazirligi qoshidagi harbiy prokuror Mas’ud Rahuma Liviya Markaziy saylov komissiyasiga Liviya milliy armiyasi bosh qo‘mondoni Xalifa Haftarni hamda mamlakat sobiq rahbari Muammar Kaddafining ikkinchi o‘g‘li Saif al-Islom Kaddafini prezidentlik saylovlarida ro‘yxatdan o‘tkazmaslik so‘rovi bilan murojaat qildi. Rahuma o‘z murojaatida bu ikkisiga jinoiy ayblov e’lon qilinganini ta’kidlagan, deb yozadi “Kommersant”.
“Agar komissiyadan javob olmasak, qonun bizga buyurgan tarzda harakat qilishga majbur bo‘lamiz”, — dedi harbiy prokuror o‘rinbosari Muhammad Garuda. “Bizda Saif al-Islom va Haftar ishtirok etgan jinoiy huquqbuzarliklar bo‘yicha fuqarolik adliya organlari tomonidan taqdim etilgan hujjatlar va da’volar bor”.
Liviyada parlament va prezidentlik saylovlari 24-dekabr kuni bo‘lib o‘tishi kerak, ammo buning uchun tegishli qonunlarni qabul qilish zarur. Davlat kengashi parlament tomonidan taklif qilingan normalarni ma’qullamadi. Bunga avvalo Haftarga o‘z nomzodini olg‘a surishga imkon bermaslik sabab bo‘lgan, deyiladi xabarda. Davlat kengashi saylovlarni 2023-yilgacha kechiktirishga chaqirdi.
Prezidentlik uchun Haftarning nomzodi 16-noyabrda, Saif al-Islom Kaddafiniki esa 14-noyabrda ko‘rsatilgan.
2011-yilda Liviya inqilobi yetakchisi Muammar Kaddafi ag‘darilib, qatl etilganidan so‘ng Liviyada yagona boshqaruv organi tuzishga muvaffaq bo‘linmadi. Mamlakatda qo‘sh hukumat o‘rnatildi: bir tomondan Tripolida Birlashgan Millatlar Tashkiloti tan olgan bosh vazir Faiz Sarraj boshchiligidagi Milliy kelishuv hukumati (MKH), boshqa tomondan Haftar tomonidan qo‘llab-quvvatlangan bosh vazir Abdulla Abdurahmon at-Tani boshchiligidagi muvaqqat hukumat. Prezidentlik saylovi 2019-yilning bahorida bo‘lib o‘tishi kerak edi, biroq Xalifa Haftar kuchlarining Tripoliga hujumi tufayli u noma’lum muddatga qoldirildi. Yangi sana Liviya siyosiy muloqot forumi yakunlariga ko‘ra belgilangan edi.
Izoh (0)