Ливия Миллий бирлик ҳукумати Мудофаа вазирлиги қошидаги ҳарбий прокурор Масъуд Раҳума Ливия Марказий сайлов комиссиясига Ливия миллий армияси бош қўмондони Халифа Ҳафтарни ҳамда мамлакат собиқ раҳбари Муаммар Каддафининг иккинчи ўғли Саиф ал-Ислом Каддафини президентлик сайловларида рўйхатдан ўтказмаслик сўрови билан мурожаат қилди. Раҳума ўз мурожаатида бу иккисига жиноий айблов эълон қилинганини таъкидлаган, деб ёзади «Коммерсантъ».
«Агар комиссиядан жавоб олмасак, қонун бизга буюрган тарзда ҳаракат қилишга мажбур бўламиз», — деди ҳарбий прокурор ўринбосари Муҳаммад Гаруда. «Бизда Саиф ал-Ислом ва Ҳафтар иштирок этган жиноий ҳуқуқбузарликлар бўйича фуқаролик адлия органлари томонидан тақдим этилган ҳужжатлар ва даъволар бор».
Ливияда парламент ва президентлик сайловлари 24 декабрь куни бўлиб ўтиши керак, аммо бунинг учун тегишли қонунларни қабул қилиш зарур. Давлат кенгаши парламент томонидан таклиф қилинган нормаларни маъқулламади. Бунга аввало Ҳафтарга ўз номзодини олға суришга имкон бермаслик сабаб бўлган, дейилади хабарда. Давлат кенгаши сайловларни 2023 йилгача кечиктиришга чақирди.
Президентлик учун Ҳафтарнинг номзоди 16-ноябрда, Саиф ал-Ислом Каддафиники эса 14 ноябрда кўрсатилган.
2011 йилда Ливия инқилоби етакчиси Муаммар Каддафи ағдарилиб, қатл этилганидан сўнг Ливияда ягона бошқарув органи тузишга муваффақ бўлинмади. Мамлакатда қўш ҳукумат ўрнатилди: бир томондан Триполида Бирлашган Миллатлар Ташкилоти тан олган бош вазир Фаиз Саррож бошчилигидаги Миллий келишув ҳукумати (МКҲ), бошқа томондан Ҳафтар томонидан қўллаб-қувватланган бош вазир Абдулла Абдураҳмон ат-Тани бошчилигидаги муваққат ҳукумат. Президентлик сайлови 2019 йилнинг баҳорида бўлиб ўтиши керак эди, бироқ Халифа Ҳафтар кучларининг Триполига ҳужуми туфайли у номаълум муддатга қолдирилди. Янги сана Ливия сиёсий мулоқот форуми якунларига кўра белгиланган эди.
Изоҳ (0)