Viskonsin shtatining Uokesho shahrida yo‘ltanlamas Rojdestvo paradi ishtirokchilarini urib ketishi oqibatida bir necha kishi halok bo‘ldi. Bu haqda politsiya bayonotiga tayanib, Associated Press agentligi xabar berdi, deb yozadi “RBK”.
Ammo politsiya qurbonlar sonini oshkor etmagan. Bundan tashqari, ko‘ngilsiz hodisa oqibatida 23 kishi jarohat olgan. Politsiya ma’lumotlariga ko‘ra, 11 nafar katta yoshli va 12 nafar bola shifoxonaga yotqizilgan. Jabrlanganlar orasida — parad ishtirokchilari va raqs guruhi a’zolari bor.
Reuters’ning yozishicha, gumonlanuvchi qo‘lga olingan, uning mashinasi ham topilgan. Shu bilan birga, politsiya sodir bo‘lgan voqeaning terrorchilikka bog‘liq yoki yo‘qligi haqida hech narsa demagan.
Mahalliy vaqt bilan soat 16:39 da qizil yo‘ltanlamas Rojdestvo paradi ishtirokchilarini urib yuborgan. Bayramning translyatsiya videosida mashina katta tezlida jarayon o‘tkazilayotgan yo‘lning harakatlanish qismiga kelib urilganini ko‘rish mumkin. U, shuningdek, orkestr a’zolarini va raqqos qizlarni ham urib yuborgan.
Avvalroq Texasda poyga mashinasi tomoshabinlar ustiga yurib ketishi oqibatida 29 kishi jarohat olgani to‘g‘risida xabar berilgandi.
Izoh (0)