Abdulaziz Komilov “Yevropa Ittifoqi—Markaziy Osiyo” shaklidagi 17-vazirlar uchrashuvida ishtirok etdi

22-noyabr kuni Dushanbe shahrida “Yevropa Ittifoqi—Markaziy Osiyo” shaklidagi 17-vazirlar uchrashuvi bo‘lib o‘tdi, deb xabar beradi O‘zbekist1on TIV matbuot xizmati.

Ma’lum qilinishicha, tadbirda Qozog‘iston, Qirg‘iziston, Tojikiston, Turkmaniston, O‘zbekiston tashqi siyosat mahkamalari rahbarlari hamda Yevropa Ittifoqining tashqi ishlar va xavfsizlik siyosati bo‘yicha Oliy vakili ishtirok etgan. Unda Yevropa Ittifoqi va Markaziy Osiyo mamlakatlari o‘rtasidagi munosabatlarning dolzarb masalalari, xavfsizlikning umumiy muammolari, savdo, investitsiya, ekologiya sohalarida hamkorlikni kengaytirish istiqbollari, shuningdek, mintaqalararo aloqalarni chuqurlashtirish masalalarini muhokama qilingan.

O‘zbekiston tashqi ishlar vaziri Abdulaziz Komilov o‘z nutqida Markaziy Osiyo va Yevropa Ittifoqi o‘rtasidagi hamkorlikning innovatsion modelini shakllantirish, uzoq muddatli istiqbolda yangi o‘sish nuqtalarini aniqlash bo‘yicha qat’iy choralarni amalga oshirish muhimligini ta’kidlagan.

Tariflarni uyg‘unlashtirish, bojxona tartiblarini soddalashtirish, barcha biznes subyektlari uchun teng sharoitlar yaratish, raqamli texnologiyalardan samarali foydalanish, transport-kommunikatsiya loyihalarini amalga oshirish orqali hududlararo va mintaqalararo savdo-iqtisodiy aloqalarni faollashtirish uchun keng imkoniyatlar mavjudligi qayd etilgan.

“Afg‘onistonda gumanitar falokatning oldini olish, mamlakatni mintaqaviy iqtisodiy jarayonlarga jalb etish, afg‘on tomoni bilan konstruktiv muloqotni yo‘lga qo‘yish bo‘yicha tezkor va o‘zaro kelishilgan chora-tadbirlarni amalga oshirish zarurligi ta’kidlandi”, — deyiladi xabarda.

Uchrashuv ishtirokchilariga O‘zbekiston tomonidan yashil iqtisodiyot tamoyillarini joriy etish, ekologiya va bioxilma-xillikni saqlash, tabiiy resurslardan oqilona foydalanish borasida amalga oshirilayotgan chora-tadbirlar haqida ham ma’lumot berilgan.

O‘zbekiston tomoni Yevropa Ittifoqi bilan ushbu yo‘nalishdagi aloqalarni, jumladan, BMTning Orolbo‘yi mintaqasi uchun inson xavfsizligi bo‘yicha ko‘psheriklik Trast fondi doirasida hamkorlikni kengaytirishga tayyorligi bildirilgan. Uchrashuv yakunida Qo‘shma kommyunike qabul qilingan.

Avvalroq Abdulaziz Komilov O‘zbekiston—Yevropa Ittifoqi hamkorlik kengashi yig‘ilishi yakunlari bo‘yicha jurnalistlarning savollariga javob berar ekan Afg‘onistondagi bugungi murakkab vaziyat va O‘zbekistonning “Tolibon” bilan munosabati haqida to‘xtalib o‘tgandi. “‘Tolibon’ nafaqat Afg‘onistondagi asosiy kuch, balki afg‘on jamiyatining bir qismidir. Ular hech qachon milliy chegaralardan tashqarida terrorchilik hujumlarini uyushtirmagan. Markaziy Osiyoda, Yevropada, AQShda, Janubiy Osiyoda yoki boshqa joyda ‘Tolibon’ tomonidan uyushtirilgan teraktga bir misol keltira olmaysiz”, — degan edi Komilov.