Toshkent shahrida 20-noyabr kuni vaksinalarni sifatli saqlovchi yirik sovuqlik ombori ishga tushirildi. Bu haqda Sog‘liqni saqlash vazirligi matbuot xizmati xabar berdi.
Inshootning ochilish marosimida sog‘liqni saqlash vaziri Behzod Musayev ham ishtirok etgan. Shuningdek, YuNISEFning Yevropa va Markaziy Osiyo mamlakatlari bo‘yicha mintaqaviy direktori Afshan Xan, JSSTning O‘zbekistondagi vakolatxonasi rahbari Lian Kuppens, Sanitariya-epidemiologik osoyishtalik va jamoat salomatligi xizmati mutasaddilari hamda boshqa mas’ullar ishtirok etgan.
Tadbirda onalar va bolalar salomatligi va kasalliklarning oldini olish davlat siyosatining ustuvor yo‘nalishlaridan biri ekani, bunday miqyosdagi sovuqlik omborining ochilishi sohada boshlangan sa’y-harakatlarni yanada jadallashtirishi alohida ta’kidlandi.
Mazkur ombor mamlakatda milliy emlash dasturi uchun logistika markaziga aylanib, vaksinalarni yetkazib berish va ularni boshqarish bo‘yicha imkoniyatlarni yanada kengaytirishi hamda O‘zbekistonda ishonchli emlash tizimini yaratishga xizmat qilishi aytib o‘tildi.
Respublika vaksinalar ombori katta miqdordagi turli vaksinalarni saqlashga mo‘ljallangan muhim inshoot bo‘lib, deyarli 1000 kvadrat metrdan iborat uchta sovuqlik kamerasi (2-8 daraja), ultrasovuq sovitkichlar (3000 litr hajmli) va muzlatkich xonalar (40 kub metr) bilan jihozlangan. Shu bilan birga, inshoot immunizatsiya uchun zarur materiallar saqlanadigan 1000 kvadrat metr quruq omborga ham ega.
Omborxonada yuklarni tez va samarali boshqarish uchun elektr yuk ko‘targichlar, dok naveslari, tekislash platformalari va ko‘tarish mexanizmlari mavjud. Ular ikkita elektr tarmog‘iga ulangan bo‘lib, uzluksiz elektr ta’minoti uchun kuchli zaxira dizel generatoriga ega.
“Yaxshi ishlaydigan ta’minot tizimi va sovuqlik zanjiriga ega bo‘lish samarali milliy immunizatsiya dasturi uchun juda muhim. YuNISEF O‘zbekistonning butun milliy ta’minot tizimi va sovuqlik zanjiri uzluksiz ishlashiga hissa qo‘shadigan hamda mintaqadagi boshqa mamlakatlarga namuna bo‘la oladigan ushbu obyekt qurilishida ishtirok etganidan mamnun”, — deydi YuNISEFning Yevropa va Markaziy Osiyo mamlakatlari bo‘yicha mintaqaviy direktori Afshan Xan.
Izoh (0)