DXX Surxondaryoda 115 kilodan ortiq giyohvand moddalarning noqonuniy muomalasiga chek qo‘ydi

Davlat xavfsizlik xizmatining Surxondaryo viloyati bo‘yicha boshqarmasi xodimlari tomonidan Termiz shahrida o‘tkazilgan tezkor-qidiruv tadbirlari natijasida katta miqdordagi giyohvand moddalar musodara qilindi. Bu haqda idora matbuot xizmati “Daryo”ga ma’lum qildi.

Xususan, 39 yoshli fuqaro 28,89 kilogramm opiy hamda 2 kilogramm gashish moddalarini, shuningdek, boshqa bir holatda esa muqaddam giyohvand moddalar bilan bog‘liq jinoyat sodir etgani uchun sudlangan aka-uka (1962 va 1970-yillarda tug‘ilgan) 9,16 kilogramm opiy va 446 gramm geroin moddalarini kelgusida sotish maqsadida qabul qilib olgan vaqtida ashyoviy dalillar bilan ushlangan.

Ta’kidlanishicha, har ikki holatda ham giyohvand moddalar afg‘onistonlik narkokuryerlar tomonidan mamlakat hududiga olib o‘tilgan.

Sariosiyoda kuzatilgan holatda tojikistonlik narkokuryerlar tomonidan tumanning tog‘li hududiga o‘tkazilib, xufiya joyga berkitib ketilgan 28,5 kilogramm opiy moddasini qabul qilib olgan 31 yoshli mahalliy fuqaro ushlangan.

DXX xodimlarining Surxondaryo viloyati bojxona boshqarmasi bilan hamkorlikda Termiz shahrida o‘tkazgan tezkor tadbirida esa 52, 51 va 31 yoshli uch nafar fuqaro 481 gramm opiy moddasini 9400 AQSh dollariga sotgan vaqtlarida qo‘lga olingan.

DXX, IIV hamda Davlat bojxona qo‘mitasining hududiy boshqarmalari xodimlari hamkorligida o‘tkazilgan tezkor tadbirda Termiz tumani “Manguzar” YPX maskanidan o‘tib, viloyat markazi tomon harakatlanayotgan Spark avtomashinasi to‘xtatilgan.

Avtomashina ko‘zdan kechirilganda, unda yo‘lovchi sifatida ketayotgan, Tojikiston fuqarosi (Dushanbe shahrida istiqomat qiluvchi, 34 yoshli) va denovlik fuqaroga (Denov tumanida yashovchi 36 yoshli) tegishli yuk sumkalarida Afg‘onistondan kontrabanda yo‘li bilan olib kelingan 45,9 kilogramm gashish borligi aniqlanib, protsessual tartibda rasmiylashtirib olingan.

O‘tkazilgan tezkor tadbirlar natijasida jami 67,43 kilogramm opiy, 47,9 kilogramm gashish hamda 446 gramm geroin giyohvand moddalari musodara qilingan.

Hozirda mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.

Avvalroq Toshkent viloyatida 4 kilogramm giyohvand modda saqlayotgan erkak aniqlangani, IIB xodimiga ishni yopish uchun pora bergan o‘g‘li esa qo‘lga olingani, DXX Jizzax, Andijon va Toshkent viloyatlarida giyohvand moddalar savdosi bilan shug‘ullangan bir necha xorij fuqarolarini ushlagani to‘g‘risida xabar berilgandi.